عن الامتياظ :)

الامتياز كتجربة شخصية
ـــــــــــــــــــــــــــــــــــــ
كان نفسى من فترة طويلة انى اكتب انطباعاتى عن فترة الامتياز والحاجات اللى عملتها فيها وكانت كويسه والحاجات اللى كان نفسى اعملها وكسلت للاسف ومن الحاجات اللى كان نفسى اعملها وكسلت هى انى اكتب المقال دا لكن شجعنى النقاش ( اللى كان بيقلب بخناق ف كتير من الاوقات ) اللى صنعه قرار قضاء الامتياز 6 شهور فى اسيوط والى تم تعديله من سيادة العميد مؤخرا وكمان انى شفت زملاء كاتبين انطباعتهم عن نفس الفترة قلت اقول اللى عندى وعشانا عليك يا رب

- حقسم الكلام لنقط صغيرة عشان محدش يمل واللى عايز نقطة يقراها ويقفل من غير ما يتوه
ــــــــــــــــــــــــــــــــــــــــــــــــــــــــــ
الامتياز : ترتيب الاقسام حسب ما ترغبه
ـــــــــــــــــــــــــــــــــــــــــــــــــــــــــ
لو عايز فترة امتياز مفيدة يبقى لازم تنسق حتبتدى ايه قبل ايه واحتشتغل انهى تخصص ف انهى شهر حتى لو بتخطط انك ما تشتغلش حاجة ف الامتياز يبقى لازم برضه تخطط لكدا وحديك مثال : انا كنت عايز اشتغل واتعلم قوى وما كنتش عايز اطلع بره الجامعة وعشان كدا سالت لقيت ان اول شهرين ف الامتياز بيبقى مشكلتهم مع كل الناس ف الجامعة ان النواب الجينيور بيبقوا لسه داخلين الاقسام جديد وعايزين يشتغلوا اى وكل حاجة اضافة الى ان معلوماتهم بتبقى بسيطة مش فارقه عن الامتياز كتير وعشان كدا دورت على مكان ما يكونش فيه جينيورز ف اول شهرين !!! طبعا المكان الوحيد هو الاستقبال والاصابات ...الاستقبال ما بينزلوش الا نواب كبار والاصابات الجينوير بتبقى اهتماماته اكبر من شويه غرز ف الفحص وبنك الدم كدا كدا عمل مكتبى ... فترة رمضان بتبقى فترة مفهاش شغل كتير ف معظم الاقسام الا الحاجات اللى ملهاش توقيت " حوادث الجراحة وحوادث النسا " فاخدت فترة رمضان فيهم واخيرا اخر شهرين كنت عايز عمل مخفف عشان الحق اخلص الاوراق المطلوبة فاخترت قسم ما كنتش عايز اتخصص فيه ومش فارق معايا كتير " الباطنة العامة" .... لاحظ انك لما بتبقى محدد انته عاوز ايه من الاول دا بيريحك كتير بس حاول ف نفس الوقت ما تخليش نفسك محدد خالص بقسم واحد تحضر فيه وتشتغل فيه لانه ممكن ما تقدرش تدخله نايب وما تعرفش تدخله صحة فيما بعد

________________________________
بره الجامعة ولا جوه الجامعة
_______________________________
على حسب انته رايح فين يعنى لو انته عارف انك ليك نيابة ان شاء الله فانته محتاج تتعرف اكتر على المكان اللى حتشتغل فيه بعد كدا وتعمل علاقات كويسه مع الناس اللى فيه ف القسم اللى حتبقى فيه وف الاقسام التانية ( لاحظ ان معظم الشغل بيخلص ف اغلب الاحوال بالعلاقات الشخصية بين النواب اللى بيطلق عليها السينس ) وف حالة ما تكون حتطلع ف الصحة فطبعا حتحتاج تعرف انته حتطلع على فين وحتعمل ايه وان كان خلى بالك من انك فى كتير من الاماكن مش كلها حتلاقى نفسك بتعلم نفسك بنفسك لان مفيش حد هناك ودا غير انه مسئولية حط نفسك مكان المريض اللى حيعالجه !
_____________________________
طيب بره الجامعة ف القاهرة ولا ف بلدنا ولا سياحى
_____________________________
القاهرة مجال مفتوح فيه مستشفيات تعليمى ومستشفيات فيها ناس مستواها قوى جدا وعندها استعداد تعلم الصغير وفيها برايفيت وفيها برضه مستشفيات غريبة ( اذكر منها مستشفى الحوامدية العام اللى كان بعض زمايلنا بيكتبوها عشان المطلوب فيها هو نبطشية استقبال كل 15 يوم ومالهوش دعوة بيك بعد كدا تروح تشتغل برايفيت تحضر ف القصر العينى تنام ف بيتكم انتا حر )
الشغل ف البلد : لو حتطلع الصحة حيبقى فرصه تشوف المكان اللى حتبقى فيه وتتعرف على الناس بس فيه نصيحة مهمة ف الموضوع دا هو ان دايما بيبقى الواحد وهو لسه ف بداية المشوار ليه غلطات وخصوصا لما يبقى ف مكان مش مجهز كويس ومفيش حد كبير يشيل عنه فلو حتشتغل ما تشتغلش ف بلدك بالضبط لان لو حصل معاك مشكلة حتفضل ف وشك طول العمر والاحسن اشتغل ف البلد اللى جنب بلدك :)
سياحى : ودا انك تحول الامتياز ف الاقصر واسوان او الغردقة وتشتغل طبيب ف قرية سياحية او على نايل كروز ... بتجيب فلوس طبعا بس تعليم صعب شويه ..مش حقولك ان الفلوس حتيجى قدام وان المسئولية لو حصل حاجة والكلام دا بس حقولك ان دا ممكن ينفع اسبوع ولا اسبوعين لكن عشان تضيع فترة شهرين او اكتر .... مش موافقك

ـــــــــــــــــــــــــــــــــــــــ
جوه الجامعة : هوا كله ريكوستات ريكوستات ...مفيش تعليم
_________________
زى ما قلت قبل كدا ترتيبك للاقسام على حسب اهتماماتك بيساعدك كتير كمان لو فيه قسم انته حابب انك تدخله او تخصص فيه يبقى حاول تاخده ف الاول ( مش ف الاول قوى عشان النواب الجينيورز ) لكن على الاقل ف الشهرين اللى بعديهم ودا حيساعد تاخد قرار بدرى غير انه حيساعدك تحضر فيه ف اوقات الفراغ ف باقى الاشهر ..فيه زمايلى كانوا شايفين ان العكس هو الاصح بمعنى انك تخلى القسم اللى انته عايزه اخر شهرين فتشتغل فيه كانك نايب من الامتياز وتكمل فيه ...انا كنت عايز قسم واخدت فيه شهر 5 و6 وكنت بحضر فيه باقى السنة لكن ما جليش ف النيابة ودخلت قسم تانى كنت عايزه برضه بس ما حضرتش فيه ف الامتياز كتير ( للغرابة كنت بروحه ف الريكوستات بس :)) )
- نقطة الريكوستات فعلا مملة ف الجامعة وغير مفيدة لو اخدتها زى ما النايب بيدهالك ..الصورة الكلاسيكية للريكوستات مثلا ف الاطفال نايب القسم ينزل العيادة الصبح تيجى تقعد معاه ف العيادة يقولك بس معلش فيه ريكوستات بالقسم تطلع تلاقى 3 تذاكر مع الحكيمة فيهم ريكوستات تاخدهم وتطلع والعيل وامه وراك وتلف على ال3 اقسام ودا تطلعله يقولك النايب ف العمليات ودا يقولك الريكوستات ف القسم مش ف العيادة ودا يقولك الريكوستات الكولد ف النبطشية وغيره كتير ...اوكال اتعلم ازاى ... نصيحتى ليك خليك ريزل ...بالضبط كدا بمعنى السيناريو اللى كنا بنعمله غير اللى قريته خالص ..النايب ف العيادة يقولك فيه ريكوستات اقوله اوكيه اطلع اجيب العيانين والتذاكر وانزله ..فيهم ايه دول يا دكتور صعب قوى انه ما يدرش عليك حتلاقى عيل فيه فيندج معينة لو حاولت تفحصه ف العادى امه حتعملك مناحه من ان كل اللى بيعدى بيفعص ف ابنها لكن لما تقلها لازم اشوفه عشان حنعرضه على دكتور ف قسم تانى حتدعيلك وبعدين النايب اخليه يورينى لو مش شايف لو النايب زرجن وقالك روح بيهم وخلاص يبقى بجد انا مش عامل انا دكتور يا تورينى فيه ايه مش رايح غير على رئيس القسم :)) طبعا ف العادى طول فترة الامتياز مالجئناش لموضوع رئيس القسم الا مرة واحده بس ومع الوقت علاقتك بالنايب بتبقى احسن ولما بيلقيك انترستد وبتخلصه شغل مش حيبقى وحش معاك وبعدين كنت بشوف حد امتياز زميلى ف القسم اللى انا رايحه اكلمه اسئلة روكوستاتكم فين والساعة كام وساعات بنبقى مرتبين مع بعض هوا كمان معاه ريكوستين ف القسم اللى انا فيه بخليه يبعتلى العيانين وانا ابعتهمله ونخلص وكل واحد ف مكانه ...الحركة التانية عشان ما تلبسش ف مشاوير الريكوستات هى حكيمة القسم اللى انته فين ..ف قسم فيه ريكوستات كتير زى الاطفال بتلاقى الحكيمة نفسها عارفه مواعيد الريكوستات واماكنها ف باقى الاقسام او لو حكيمة كويسه حتاخد منها تلفون القسم التانى وتتصل تشوف النايب فين وتجيبله الحالة امتى ( ف الريكوستات اللى بالليل والفيتنس بالذات ) والجزء الاخير من الريكوست هو القسم اللى انته رايحه لما تكون عارف الحالة ايه وجاى تشوف النايب حيقول ايه غير ما تديله تذاكرة وتقوله معايا ريكوست يا دكتور ... برضه فيه ناس غلسه ومش حتوريك حاجة وفيه ريكوستات مفهاش تعليم ومالهاش لازمة بيسموها ميديكولايجال بس برضه ما تتوقعش ان حد حيمسك ايدك ويقولك والنبى يا دكتور الامتياز تعالى اشرحلك الحالة دى بالتفصيل ( للتوضيح انا ف حركة من الرزالة ف الريكوستات سمعت كلام مش كويس من حد من نواب القسم اللى بقيت مدرس مساعد فيه بعد كدا ...لكن برضه عديناها بهزار وبرضه خلصت الريكوست ودلوقتى بقت ذكريات ازلة بيها بعد ما بقينا زملا ::)

_____________________
غلطات مشهورة
___________________
- اشهر غلطة عملتها وزمايلى عملوها وانته كمان بعد ما تقرى الكلام دا حتعملها انك تشترى كتب ف الامتياز :)) مش الغلطة ف الكتب الغلطة ف النوعية والكم ..احنا بعد 7 سنين دراسة ف الكلية صعب قوى تعدى سنة من غير ما يبقى معاك كتاب ودا ف حد ذاته حاجة كويسه لكن الوحش انك تخلى كتاب هوا اللى يسوقك بمعنى انك تنسى كل اللى قريته وذاكرتهف حياتك وتمشى باندكس فيه اسماء الادوية وف اخر 10 صفحات فيه وصفات "مجربة " للاسهال والقئ والسخونة وغيرها ويبقى هوا دا اللى بتمشى بيه :((
الصح فى راى المتواضع هوا انك تعمل اجندة للامتياز تكتب فيها الحاجات اللى بتشوفها والناس من حواليك النواب والاخصائيين او الاساتذه كتبولها ايه وتبقى برضه ريزل وتسألهم ليه ... فيه حاجات اه الوصفات دى بتنفع فيها لكن عيب قوى بعد دراسة وتعب يبقى اخرك تنقل من كتاب زى دا حتقولى انهم ما كنوش بيدهالنا ف الكلية حقولك لا كانوا بيدولك بس كان بيكتبلك العلاج مثلا انتى بيوتك وما يقولش انهى واحد ...انته حتشوف انهى واحد من الناس اللى شغال معاهم ف المستشفى وحتسمع من المندوبين اللى بيجوا وغيره
- الغلطة التانية زى الاولانية بس عكسيه ... تدخل الامتياز سخن وتعدى على بتاع الكتب اللى كنت بتشترى منه وانته طالب وتجيب كتب المعادلة والزمالة واكسفورد والنجار وكيف تصبح طبيب ناجح ف 3 ايام وتكومهم على مكتبك طووول فترة الامتياز وصدقنى مش حتفتح منهم الا القليل عارف ليه ؟ لانك مش محدد هدفك كويس ...لو بجد عايز تذاكر معادلة يبقى تقرا عنها كويس وتشوف حد اخدها وتساله وبعدين اشترى كتب لكن معظمنا اخده الحماسة ف الاول واشترى وحطهم من غير اى خطة حيمتحن امتى وازاى ولا حيذاكر امتى ...غير المعادلات والزمالة فيه مجموعة كتب اوكسفورد جميلة جدا للجى بى وغيره لكن المشكلة مش حتلاقيها مفيدة ليك قوى لانها بتتكلم على الجى بى عندهم يمكن ما عدا كتاب الاستقبال accident and emergancy medicine باقى السلسة كانت بعيده التطبيق الواقعى عندنا ف بلادنا ...دى برضه وجهه نظر شخصية ...الخلاصة : ما تشتريش وخلاص وركز ف الحاجاة اللى انته عايز تتعلمها واسال الناس اللى اكبر ف التخصص
- نقطة انك تشتغل فى بلدك بمعناها الصغير ودى نقطة قولتها قبل كدا وباكدها خصوصا لو الشغل برايفيت
-حاول ما تخدش الامتياز كله ف مكان واحد حتى لو المكان ممتاز وانته مرتاح حاول تزود فرص احتكاكك بالناس وشوف اماكن جديدة وامكانيات ناقصة او موجوده غير كدا حتلاقى فرص لحاجات مثلا زى مستشفيات او مراكز الاعلانات بتاعتها مش بتنزل الا ف نص سنة الامتياز ومعظم الناس ما تعرفش عنها حاجة
- حتى لو ما اخدتش جزء من الامتياز بتاعك ف القاهرة حاول كل فترة تنزل تشوف ايه الاخبار ... للاسف مازال هناك فرق بين العاصمة والاقاليم ف بلدنا وعشان كدا انزل مرة دورة من دورات النقابة او وركشوب تبع مستشفى حتشوف ناس جديدة وحتسمع كلام ما كنتش تعرفه قبل كدا ... انا ف الامتياز رحت السفارة اليابانية عشان اساله على منحة الحكومة اليابانية وتفاصيلها وقابلنا المرشد التعليمى هناك وركت المركز الثقافى الفرنسى عشان اسال على المعادلة الفرنسية ( حاجة مجهولة كدا محدش كتير يعرفها بس ف وقتها كانت كويسه جدا) وحضرت دورة عن الاستفادة من فترة الامتياز تبع اتحاد طلبة القصر العينى وندوة عن مستقبل الاطباء ف دار الحكمة ..حاجات صغيرة بس بجد بتفرق معاك بعدين

- مش كله شغل شغل ..فيه حاجات ما لحقتش تعملها وانته طالب اعملها وانته امتياز ...مش قصدى السفر والفسح قصدى ف الحياة ..ماكنش نفسك تتعلم تلعب تنس او اسكواش مثلا :)) تقرا شويه كتب مش طب ..تاخد دورة اى سى دى ال ..تاخد دورة لغة ..كان نفسك تعمل ريجيم وتخس ...كل دا ممكن ومش ممكن ..الفيصل انك تعمل لنفسك فترة زمنينة وحاجة كدا زى جدول بس مش جدول مذاكرة جدول لاحلامك واعتقد انك تستاهل دا بعد 7 سنين من وجع القلب ...انا كان نفسى اعمل كتير لكن ابتديت كويس وبعدين كسلت زى ما كسلت اكتب المقال دا من 4 سنين لكن ما يمنعش انى اخدت مستويين لغة فرنسية ف الامتياز وكنت بحضر للمعادلة الفرنسية كمان :)) وخلصت اكتر من 20 كتاب كان نفسى اقراهم واجزاء من القران كان نفسى احفظهم ... بقولك عشان احمسك مش عشان اتمنظر عليك

- حاول ما تشتغلش الا شغل حيخدم وظيفتك فيما بعد بمعنى ان حتلاقى شغل كتير تبقى فيه مندوب ادوية او واقف ف صيدلية وبيجيب فلوس كويسه لكن انته مش ناوى تكمل كدا ...انته ناوى تاخد نيابة او تشتغل ممارس عام يبقى الشغل دا بيضرك لانه بياخد من وقتك ومجهوك على قد ما بيديلك فلوس ...لو انته ناوى تكمل حياتك حمندوب ادوية وان كنت مش بشجع كدا خالص لكن ف الحالة دى يبقى الفترة اللى حتشتغلها من الامتياز حتتحط ف السى فى بتاعك وحتعتبر فترة شغل ليك لكن غير كدا ما انصحكش
ــــــــــــــــــــــــــــــــــــ
العمل الاجتماعى مهم !
ـــــــــــــــــــــــــــــــــــ
زى ما اخدنا ف الصحة العامة لو تفتكر من مواصفات الطبيب الجيد انه قائد ف المجمع اللى هوا فيه ... بلاش صورة الدكتور اللى الصبح ف المستشفى وبالليل ف العيادة ولا بيشوف حد ولا حد بيشوفه شغال حصاله فلوس كلنا كانا بنعيب على المثال دا واحنا طلبة وبننتقده لكن بالتدريج بتلاقى نفسك بتعمل كدا زى الباقى ..مش بقولك بلاش شغل لكن خلى فيه وقت برضه شغل الطب لكنك لو ما اتعوتش على حاجة وانته صغير مش حتعرف تعملها وانته عندك 50 سنة ..شوف مشروع ف جمعية او دار ايتام ...شارك ف ندوة عامة ...لو بعيد عن الطب يبقى احسن عشان برضه تغير جو او وشوش على الاقل لكن لو ما لقيتش يبقى عمل تطوعى فى فترة معينة بتبقى حاجة كويسة وبتعودك من وانته صغير انك تساعد .. ايامنا احنا كان فيه مشروع كشف مجانى بيتعمل ف رمضان وكنا كل واحد بيشارك بالكشف على مرضى تبع التخصص اللى هوا خلص الشهرين بتوه وحاسس نفسه كويس فيه او حابه ...كانت حاجة جميلة وبصراحة مفيدة كمان

ـــــــــــــــــــــــــــــــــــــــــ
كان ومازال حلمى لفترة الامتياز هو عمل advisor board للامتياز مكون من اطباء من مختلف الاقسام والمستشفيات لمساعدة الامتياز ف اختيار تخصصه او طريقه بعد الكلية وعمل advisor board تانى مكون من الطلاب والامتياز لمساعدة الطلاب الاصغر سنا ف كيفية المذاكرة وطرق التحصيل خصوصا طلاب سنة اولى حتى تكون فائدة مشتركة للجميع ..حلم يا ريت حد يتبناه ونقدر كلنا نشارك فيه

ف فترة الامتياز كنا معترضين على اوضاعنا كامتياز ف المستشفى الجامعى وطلبنا من الادراة اننا نعمل ندوة لشرح وجهه نظرنا وعملناها فعلا وقدمنا كلام حلو قوى منه اللى اتحقق ومنه اللى اتنسى وما تابعناهوش واعترف ان غلطتنا اننا ما سلمناش اللى عملناه للناس اللى بعدنا ودا اللى خلى كل دفعة بتبدى من الصفر كل سنه وعلى بال ما توصل لحاجة بتبقى خلصت وتجى غيرها وهكذا فيا ريت انتوا تكونوا افضل حظا مننا وتقدروا توصلوا الرسالة للى بعدكم صح ...للحديث بقيه ان شاء الله لو عجبكم الكلام ...تحياتى

 

 

الحلقة الثانية : الامتياز ...علاقتك بالاخرين
ــــــــــــــــــــــــــــــــــــــــــــــــــــــــــــــــــــ
فى اثناء فترة الدراسة بيبقى معظمنا علاقته محصورة ف التعاملات مع زمايله ف الكلية او فى المدينة واساتذته ف الكلية ولو وسع دايرة تعاملاته حيبقى بالكتير مع سواقين التاكسى بتوع كل يوم ... مع بداية الامتياز حتلاقى نفسك بتتعامل مع ناس تانية كتير وبشكل مكثف جدا عن فترة ما قبل الامتياز حتلاقى نفسك بتتعامل بشكل يومى مع موظفيين حكوميين من اللى بتشوفهم ف الافلام العربى ( مش كلهم لكن حتلاقى منهم وانته ماشى ) حتلاقى نفسك بتتعامل مع مرافقين مرضى من مختلف التوجهات والاقطار ..بتتعامل مع ممرضيين وممرضات وبتتحط فى مواقف بتفرض عليك انك تتصرف من غير ما يبقى جنبك حد تاخد رايه او حتى امكانيات المستشفى الضعيفة اللى اتعودت عليها ( زى ما يصحوك بالليل عشان تشوف جاركم ما بيردش ليه هوا مغمى عليه ولا اتوفى )

ـــــــــــــــــــــــــــــــــــــــــــــــــــــــــــ
علاقتك بنفسك اولا ....
ــــــــــــــــــــــــــــــــــــــــــــــــــــــــــ
اول علاقه المفروض انك ترسم ملامحها وتفهمها كويس هى علاقتك بنفسك وتعاملك معاها ...دى مش فلسفه ولا حاجة دا بجد ...كتير مننا دخل كليه الطب عن غير رغبة او اقتناع وماشى بيادى واجب وخلاص وناس تانى دخلت عشان بتحبها قوى وكرهتها ف نص السكة وناس تانى دخلت مش فارقه معاها وحبت الدراسة والطب بعدين ...خلاصه القول بعد ما خلصت 7 سنين من عمرك ف المهنة دى لازم يبقى عندك تصور واضح لنفسك ...انته طبيب ولا لا؟ فيه ناس بتبقى صريحة مع نفسها من الاول هى اخدت الكلية لكن مش عايزه تكمل ف الكارير دا ودا برغم انه قرار صعب لكن انك تاخده وتشوف حاجة تانى تشتغل فيها اسهل كتير من انك تعيش باقى حياتك متردد او تكمل ف طريق انته مش عايزه مما يجعلك على طول الخط ف اكتئاب واحباط ( حيجى الكلام بعدين عن لو مش عايز تشتغل دكتور بعد دا كله تعمل ايه ...الصبر ) النقطة هنا انك لازم تقعد مع نفسك ف الاول وتحدد انته عايز ايه وشايف نفسك ايه بعد 7 سنين من الدراسة ف المجال دا ...ناس كتير بتتاخر فى القرار دا لغايه قبل ما يخلص الامتياز بفترة صغيرة ويتاخر ف كتابة النيابات ويتلخبط فيها ويكتب حاجة ولما تيجله ما يستلمش لانه مش شايف نفسه فيها ..كل دا بيبقى نتيجة تاخير ف القعدة المهمة دى اللى لازم تقعدها الاول مع نفسك بورقة وقلم وتكتب ...كل واحد فينا ليه نقطة قوة وضعف لازم يبقى صريح مع نفسه فيها عشان على اساس الكلام دا حيقدر يحدد بعد كدا السكة اللى عايز يمشى فيها ..مثال: واحد قاعد يذاكر فى معادلات ويشوف اخبار زمالات وغيره وهو عارف كويس انته ما يقدرش يسافر بره البلد لظروف عائلية خاصة او مشكلة مالية ف الوقت الحالى يبقى هوا كدا مش بيخطط صح لكن فى نفس الوقت ممكن يحول ظروفه دى لنقطة قوة ف صفه لو كتبها واتعامل معاها بواقعية فممكن مثلا انه بدل ما بيدور على معادلة لازم يسافرها ممكن يدور على زمالة كل اجزائها بيمتحنها ف مصر من غير سفر او لو المشكلة مادية يبقى يعمل حسابه من تحويش او جميعة او غيره بحيث انه يبقى عارف انه بعد كام شهر حيبقى عنده قدره يبتدى لكن يسبها كدا مش حيوصل لحاجة ( اعقرها وتوكل )

ــــــــــــــــــــــــــــــــــــــــــــــــــ
علاقتك بربنا
ــــــــــــــــــــــــــــــــــــــــــــــ
مش حتكلم من منظور دينى او عقائدى انا بس احب افكرك بنقطة ان كل طريقنا فى مشوار الطب طريق كله مطبات وحاجات مثيرة للاكتئاب ...كل ما يكون الهدف بتاعك اسمى ومتعلق بالاخرة مش الدنيا كل ما دا سهل عليك الصبر على اللى بتشوفه ...وكل ما كان ايمانك بالله وقضائه قوى كل ما دا ساعدك انك تعرف انك لو كتبت علاج او عملت عملية والعيان بقى كويس فدا فضل ربنا ولو عملت اللى عليك كله والمريض تعب يبقى قضاء الله(خدت بالك من عملت اللى عليك كله دى) .... علاقتك مش حتبقى بس صلاة وصوم دا كمان ان يبقى عندك معلومة كويسة لانك حتبقى مصدر افتاء فى تخصصك (الطبيب الثقة هو اللى حيقول المريض دا يفطر ولا يصوم )...علاقتك بربنا هى اللى حتحدد لما يكون انته والروشته تكتب للعيان دوا غالى عشان المندوب طلعك ميتنج مع ان الدوا مكتوب عليه مكمل غذائى ومش واخد ترخيص وزارة صحة اصلا ولا حتكتب الدوا اللى انته عارف انه كويس بس مندوبه ماجبلكش ولا حتى عينة ...الخلاصة : مع قعدتك مع نفسك ابحث احوالك مع الله ... وبعد كل يوم شغل شوف نفسك لو اتحاسبت اخر اليوم اللى عملته ليك ولا عليك

_____________________
علاقتك بالتمريض
ــــــــــــــــــــــــــــــــــــــ
عارف ان فيه ناس داخله من اول المقال تدور على الجزء دا وعشان كدا حبتدى بيه قبل العلاقة مع الموظفيين والزملاء والمرافقين :) .المعضلة فى العلاقة بين طبيب الامتياز تحديدا والتمريض فى المستشفى هى نظرة كل واحد منهم للتانى ...بمعنى ان من وجهه نظر التمريض دكتور الامتياز دا دكتور ( صغنن) لسه مش عارف حاجه اهله صرفوا عليه دم قلبهم وهو فاكر نفسه يعرف كل حاجة وهو لسه ولا حاجة !!! ونظره الامتياز للتمريض انه ناس مش شايفه شغلها صح ومش زى التمريض بتاع بلاد بره وطول النهار يضحكنوا مع الدكاترة وبيعاملوهم وحش !!!
طبعا الصورة ليها جوانب تانى بس للاسف كل واحد فيهم بيبقى شايف الجنب المظلم من الصورة ...الامتياز اه بيبقى لسه دكتور صغير ومعلوماته بسيطة بس هوا بقاله 7 سنين طالع عينه وبيتعلم عشان لما يطبق يبقى على اساس ومش مجرد انه يطبق وخلاص لا كمان لازم يبدع والا يبقى زيه زى غيره ودا مش هوا المطلوب.... والتمريض ف بلدنا فعلا مظلوم وان كان مقصر لكن معظمه ليه ظروف صعبه هى اللى خليته يدخل المجال دا فبعد اعدادى بيدخل ثانويه تمريض 3 سنين ( بقيت 5 سنين دلوقتى) بعدها يطلع يواجه الحياة ويقبض مرتب ويبقى فيه مرضى مسئولين منه وهو عمره تقريبا 17-18 سنة ودا اللى بيخليه بيبقى ف سن الامتياز بقاله حوالى 5-6 سنين فى المجال وبيخليه يرفض ان الامتياز يعامله بنظره دونية مع كونه ( من وجهه نظره ) اعلم منه بالشغل ...

ما علينا من نظره كل واحد للتانى والفلسفه دى ... المطلوب هنا هو اتعامل ازاى ؟؟ لو فهمت اللى انا قلته حتعرف ان مفتاح التفاهم بين الاتنين يكمن ف الاحترام ..احترام ان التمريض اللى قدامك بيادى مهمه ووظيفه حتى لو هومقصر فيها انته تقدر توجهه بشكل غير مباشر ..مثال : وقف ف العنبر جنب الممرض انته بتقيس الضغط زى ما النايب طلب منك وجه التمريض المسئول شال للمريض قسطرة البول (من غير جوانتى ) وبعدين راح داخل على المريض اللى وراه يكشف الجرح بتاعه عشان النايب جاى يغيره ...لو قلتله البس جوانتى ...وكلام صح تماما ممكن ما يقبلش منك الكلام وياخده بتريقه او يقولك انته ما بتشوفش الدكاتره الكبار بتوعك بيعملوا ايه ولا هى جت عليا وغيره من الكلام دا لكن لو ميلك عليه بهدوء كدا وقلتله ( يا عم شوفلك جوانتى ليكون العيان عنده هيباتيتس ولا حاجة يعديك ولا حتنفعك المستشفى ولا بيسالوا ف حد ) هوا حيعتبرك بتنصحه لمصلحته فاولا حيلبس جوانتى وكدا يبقى انته حميت العيان وبرضه حميته هوا فعليا وبنيت معاه علاقه كويسه حتساعدك بعدين كتير ( انا شخصيا اتعلمت حاجات كتير من التمريض الكبار اللى اشتغلت معاهم ....مش عيب انك تتعلم من اى حد العيب انك تكابر وتعمل دكتور وانته مش عارف.خلى بالك انك ممكن تقوله كدا وبرضه مش حيلبس الجوانتى بس تاكد انه حيشيلها فى نفسه والمرة اللى بعدها حيلبسه لو الكبر هوا اللى منعه ف المرة الاولانية

- شكوى كتير من الامتياز ...النايب بيفضل التمريض اللى معاه ف القسم عنى ف المعاملة ولو حصلت مشكلة بينى وبين التمريض بيقف ف صف التمريض ....مشكلة عويصه مش حكدب عليك وساعات التمريض فعلا بيبقى عدوانى نتيجة تراكمات تاريخية انته مالكش دعوة بيها واحسن حل لو حسيت كدا من الاول هوا انك تقول الكلام دا للنائب الموجود معاك وتحاول ان ما يبقاش فيه احتكاك مباشر ما بينك ما بين التمريض اللى بيعمل كدا معاك ولوحصل يبقى قدام النائب الموجود ...الناس اللى بتعمل مشاكل بتبقى معروفه والنائب بحكم قعدته ف القسم فترة طويلة بيبقى بيعرف يتصرف (المفروض) مع كل واحد حسب ظروفه ...لكن فى حاله التطاول لاى سبب (اتمنى انك ما توصلش للمرحلة دى) امسك لسانك كويس ( مسموح ليك تقول ان دا تقصير ان دا اهمال ...كلام عام لكن لو وصلت لمرحلة الشتايم الشخصية يبقى كدا دخلت ف مرحلة الشكاوى ودى بتبقى مشكلة وبتنزل بمستواك ع الفاضى )

- فى الامتياز اتعلم من كل اللى يقدر يديك معلومة مهما كان مكانه ...استغل فرصه ان طبيب امتياز لانك لو اتكبرت دلوقتى حتعمل ليه لما تبقى نائب القسم او لما تبقى دكتور الوحدة فيما بعد ( اول مرة اسمع ويزيز واضح كان ف استقبال احدى المستشفيات وانا طالب واللى سمعهولى كان ممرض موجود سالنى سمعت عيان ازمة قبل كدا يا دكتور قلتله لا قالى تعالى وورانى ست كانت بتيجى بصفه دورية وحط عليها السماعة وقالى حتسمع صوت زى تزيق الباب شوف كدا !!!)

- نقطة اخيرة : قصص الحب ما بين الطبيب والتمريض ممكن تحصل ف حالة واحده بس ...الافلام العربى القديمة ..دا لا يمنع ان فيه حالات حصل فيها الكلام دا لكن مش ف توقيت الامتياز دا خالص ( عشان تشيل الموضوع من دماغك دلوقتى وتركز ف التدريب ):))

____________
بكره ان شاء الله ...علاقتك بالنايب وعلاقتك بالامتياز زمايلك ...وزميلاتك
....تحياتى

 

 

الامتياز :الحلقة الثالثة : علاقتك بالاخرين

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

علاقتك بالنايب

ـــــــــــــــــــــــــــــــــــــــــــــــــــــــــــــــــــــــــــــــــــــــــ

اولا : انا مسميش امتياز!!!

ـــــــــــــــــــــــــــــــــــــــــــ

ودى نقطة ينفع تتحط في اخطاء شائعة للامتياز ... بتدخل قسم لاول مرة عشان تحضر او عشان ريكوست او حتى مع حد من البلد عشان تسال وتوصلى عليه ما ينفعش تقدم نفسك للنايب الموجود او اى حد بانك امتياز !! اومال اكدب عليه ما انا امتياز ...اه بس ليك شخصيتك ...يعنى انا فلان الفلانى امتياز ...طيب سهله دى ...اه سهله بس حتلاقى نفسك وكتير من زمايلك بيقع ف المطب دا ..طب ايه المطب ف الموضوع ..ايه فرق اسمى وايه اللى حيضيفه ....فرق اسمك انه اثبات ان ليك شخصيه مستقله ... انك قادر على تقديم نفسك وواثق من نفسك مش بتتدارى في الوظيفة اللى انته جاى عشانها ...فرقه ان الناس تعرفك ( تحب النايب يناديك باسمك ولا يا دكتور ...شوفيلى والنبى الامتياز اللى معانا راح فين ) طبعا ف قسم فيه 20 نايب و20 امتياز مش شرط انه يفتكر اسمك بس على الاقل يبقى قدمت نفسك كويس  سواء اول ما تيجى تبتدى شغل او وانته بتعرض ريكويست او بتسال على مريض ...غير كدا ناس كتير من النواب بيبقى فيه عنده فكرة مسبقة ان الامتياز يساوى طالب طالع طازه من الكلية لسه بيتفرج على الدنيا ومش عليه اى مسئولية وفرحان بشبابه فبيقفل منك  بحكم انه طالع عينه ف الشغل وينسى انه كان ف يوم من الايام كدا وكان بينشق على نايب او حتى امتياز زيه يشرحه ويوريله كلمتين يعرف يشتغل بيهم فالخلاصه قدم نفسك باسمك الاول وبعدين صفتك وخلى دايما صوتك واضح ( مش عيب انك تكون امتياز J)

ثانيا : انواع النواب

ــــــــــــــــــــــــــــــــ

طبعا انته عارف ان النواب جينيور او النايب الصغير اللى لسه داخل وسينيور ودا النايب القديم او الكبير دا من حيث الاقدمية وفى العادى دى مش بتفرق معاك كتير غير في انك في الاغلب بتبقى متواجد اكثر الوقت مع النايب الجينيور باعتبار انه بيبقى عليه معظم ضغط الشغل او في اقسام كتير هوا بيبقى مسئول الديرتى ورك ( بالمناسبة مفيش شغل ديرتى وشغل كلين ...مالا يقوم الواجب الا به فهو واجب ...يعنى لو العيان ما اتكتبلوش علاج ف التذكرة مش حياخد علاج فمش حيخف يبقى كدا كتابة العلاج مهمة زيها زى وصف العلاج ...بس اه الواحد طماع وبيبقى عايز يخطف راس القبة ويطير J) ....المتوقع بالنسبة للنواب ان الجينيور يبقى معلوماته على قده والسينيور يبقى معلوماته احسن ووقته كمان اوسع انه يشرح ويورى للامتياز لكن ساعات كتير بتلاقى السينيور مشغول بحاجات تانى اكبر ومش فاضى والجينيور اقرب ليك بحكم قرب السن او معرفه مسبقة او لانه ملسوع ف امتيازه من ان محدش شرحله فبتلاقيه احسن ف المعاملة والشرح معاك

انا بحب اصنف النواب تصنيف تانى ... نواب سيباساتيك ونواب باراسيباسيتك ... بالضبط كدا حتلاقى فيه نواب اكتيف وبيشتغلوا بسرعة وف الاغلب بيبقوا عصبييين وممكن لسانهم وصوتهم عالى بس بينجزوا ونواب هاديين بيشتغلوا برضوا بس بالراحة وبهدوء .... السيباساتيك نايب تقدر تتعلم منه ازاى تتصرف ف الظروف الطارئة وازاى تتحرك بسرعة بس ف سبيل كدا حيبقى لازم تتحمل شويه عصبيته وصوته وتتعلم انك ما تسالوهوش وهو مزنوق او ف لحظة المشكلة وتستنى لما الدنيا تهدى وف الاغلب بتلاقيه هوا اللى بيكلمك ويشرحلك لو انته واقف معاه من اول الحالة ...الباراسيباسيتك نايب فيه منه درجات فيه منه اللى هادى لدرجة انه بيكسل يشرحلك ويتكلم معاك وعايز معظم النبطشية يقعدها ف الاوضه يشيت ويكتب علاج اوحتى يلعب سوليتير على اللاب وفيه اللى بيشتغل بس بهدوء مش عايزوجع دماغ ...زى ما فيه امتياز عايزيتعلم وواحد تانى عايز يزوغ حتلاقى برضه النواب كدا ...الهادى دا مش حيشرحلك او يوريك الا لما تكون رزل شويه معاه ولازق فيه ( تقدر تسمى دا ذل التعلم زى ما بيت الشعر الشهير بيقول )

ثالثا : السيينورتى

ـــــــــــــــــــــــــــــــــــــــ

العلاقة بينك وبين النايب المفروض هى اولى العلاقات اللى حتتعلم فيها ف حياتك المهنية التدرج الوظيفى واحترام الاكبر سنا وعلما مع العلم ن الفرق بينك وبينه سنه او سنتين ولو كنت ريحت شويه ف الكلية ممكن يكون زميلك ف الدفعة ... ا ه انا بقولك خليك ريزل ولازق بس خلى بالك عشان تعمل كدا لازم تبقى ف الاصل كوي سمعاه يعنى ما تلزقش فيه طول اليوم ولما يتزنق هوا ف ريكوست او يقولك بص على العيان الفلانى تقوله ماليش فيه ... احترامك ليه حيكون ف انك تسمع كلامه ف حدود المطلوب في الشغل ....مش بقولك يبعتك تجيبله حاجة من العربية وتقوله اوامرك ...لآ .... وان كان ممكن لو حد كويس معاك قوى وعلاقتك بيه اتطورت وبقيتوا اصحاب خلاص ابقى اعمل اللى انته عايزه معاك لكن انا بتكلم على العادى والعادى ان ساعات كتير حيكون فيه طلبات سخيفة من وجهه نظرك زى ريكوست زى فيتال عيان زى الدم اتحجز تحت ولا لا ...لكن ما تنساش ان زى ما عايزه هو يشرحلك ويوريك لازم تساعده يخلص اللى وراه وف النص لازم لازم حتقدر تطلع بالمعلومة طول ما عندك اصرار وبعدين النايب مش صنم دا بنى ادم زيك زيه يعنى لما يلاقيك طالع نازل وماشى وراه صعب انه يطنشك لكن لما يلاقيك جاى شايل شنطه تقيله حاطط فيه لاب وبالطو وعشا ومش عارف ايه وحاططها ف الاوضه وقاعد جنبيها يقوم يفحص حاله ان ما كنش ينادى عليك ما تتحركش اكيد حيشوفلك ريكوست ولا مشوار يبعتك فيه بدل ما انته قاعد قدامه كدا ولو كويس قوى حيقولك بص يا دكتور مفيش حاجة دلوقتى سيب نمره تلفونك هنا ولف براحته كدا ولو فيه حاجة حكلمك ...وطبعا مش حيكلمك الا لو ريكوست ...مش حيوقلك تعالى افحص حاله مثلا .....

رابعا : النايب الغلس

ــــــــــــــــــــــــــــــــــــــــــ

نفس الكلام اللى كنت بقوله عن التمريض والمشاكل حتلاقيه ف كل حته ومنها ف النواب حتلاقى ناس غلسه بطبعها بدور على حد تغلس عليه ( مش كتير بس موجودين ف كل حته) خلى تعاملك معاهم ف اضيق الحدود ...كلفك بحاجة مش شغلك او بعيد عنك ارفض (زى موضوع العربية ) كلفك بحاجة من شغلك بس انته مش مقتنع بيها زى الريكوستات ( هوا ليه ان الريكوست يخلص عرفت تخلصه من غير ما تروح زى ما شرحنا ف اول حلقة يبقى تمام ) طلب منك حاجات كتير اكتر من زمايلك او غلس عليه بصورة فجه (تريقه او هزار مش مقبول ) ما تسكوتلوش .... بس في نفس الوقت لسانكما يغلطش .... الاجراءات القانونية موجوده وسهله زى ما هوا ممكن يكتب فيك شكوى ممكن انته كمان تشتكيه لكن تغلط فيه حيبقى "امتياز شتم نايب ...عيب والله والاتنين دكاترة " والكلام دا ...اومال ما اسكتلوش ازاى ....عادى اقلب الكلام عليه او اقولهاله صراحة ...حضرتك اللى بينا شغل واحترام واللى بتقوله دا بره الاتنين دول وانا مش قابله ...بس كدا ....غلس عليك ...على مشرف الامتياز ف القسم على طول او على رئيس القسم وصدقنى حتلاقيه هوا بيخاف منه اكتر ما انته خايف وخصوصا لو هوا اللى غلطان

 

خامسا : مشكلة المشاكل

ـــــــــــــــــــــــــــــــــــــــــ

لا تزال الريكوستات مشكلة المشاكل ... بين النايب والامتياز ...وحتى يتم حل هذا الموضوع ...عليك التصرف بحكمة ...محاولة تخليص الريكوستات ودى زى ما شرحنا او الاستفادة القصوى منها بانك تسال النايب قبل ما تطلع بيها وتفحص المريض وتروح تشرح للنايب ف القسم التانى وتطلب منه الرد وتساله فيه ( القصر العينى ف القاهرة حتى وقت قريب كان الامتياز بيطلع ريكوستات حجز ميعاد اشعه وامضاء ورق تحاليل ...مش بيقابل نواب اصلا وهوا بيعمل كدا L)

 

سادسا : حدود العلاقة

ـــــــــــــــــــــــــــــــــــــــ

كل ما كنت كويس ومهتم حتلاقى النواب بيعاملوك كواحد منهم او حتبقى صاحبهم ...بس برضه خليك ف حدود السينيورتى ودا من باب اللياقة والادب اكتر منه من باب الالزام

طيب لما يكون يكون الامتياز ولد والنايب نايبة ....سهله يبقى سينيورتى وبس

طيب بقى الامتياز بنت والنايب نايب .... برضه سينيورتى وبس

هنا مش حنقول زى ما كنت بتكلم المرة اللى فاتت على موضوع التمريض لكن حقول دايما خليك بعيد عن الحاجات اللى تجيب مشاكل وبرضه خليك بعيد عن المواقف والقعدات الفردية اللى تخليك مادة ثرية للعشاء ف استراحة الامتياز J)

 

 

الامتياز : الحلقة الرابعة : علاقتك بالاخرين (برضه)

ـــــــــــــــــــــــــــــــــــــــــــــــــــــــــــــــــــــــــــــــــــــــ

علاقتك بالموظفيين

ـــــــــــــــــــــــــــــــــــــــــــــــــــــــــــــــــــــــــــــــــــــــ

برضه من التجارب الجديدة اللى حتشوفها هى التعامل مع موظفيين الحكومة ..تجاربك السابقة او تجاربنا كلنا تقريبا تنحصر في الموظفيين اللى كنا بنتعامل معاهم في شئون الطلاب اول السنة عشان نطلع الكارنييه وموظفيين رعاية الشباب للى كان ليه نشاط وبالكتير سكرتارية الاقسام لو رايح لرئيس القسم ... اللى اقصده هنا مش دول خالص ...المقصود موظفيين السجل المدنى وموظفيين القومسيون وكل موظفى المؤسسة الحكومية في بلدنا واللى دايما بنحس انهم بيعقدوا الدنيا ويوقفوا المراكب السيايرة ويقعد يفلى ف الورق بتاعك عشان ختم ويبعتك مشوار اخر الدنيا عشان طابع ... اول نصيحة : ف التانى السلامة ...يعنى ما تبقاش رايح تمضى ورقة من مديرية مش عارف ايه وتركن العربية صف تانى وتقول مش حطول او تدى معاد لاصحابك بعدها بنصايه .... ثانى نصيحة: لو كنت مستنى انى اقولك حل  عشان تعرف تتعامل معاهم وتخلص مصلحتك بدرى ...ما تكملش قراية الحلقة اصلا  روح شوفك ساحر مش دكتور J) ثالث نصيحة : اسال الاول ...ايه الورق المطلوب واكتبه ف ورقة ويا سلام لو عرفت تسال حد من الموظفيين نفسهم ..بدل ما تروح وتيجى على طابع وورقة بوسته ...رابع حاجة: خلى دايما معاك ف المحفظة صورة للبطاقة الشخصية وصور شخصية ليك ... اسخف من انك تدور على طابع انك تدور على مكنه تصوير ... ومع الوقت حتلاقى المحفظة بقى فيها كمان شويه طوابع كدا بينفعوا ف الزنقة ...خامسا ( ايه يا عم ...كل اللى فات دام فهوش حعمل ايه مع الموظف !) فعلا اهم حاجة في تعاملك مع الموظفيين انك تعرف انه بيمشى بتعليمات واوامر على ورق بمعنى انه مهما كان كويس وراجل محترم مش حيقدر يمشيك بسرعة الا لو ورقك مستوفى وجاهز ..فما بالك لو طلع من النوع اللى يحب يساعدك تخس شويه J) ...

يبقى الخلاصة في التعامل مع موظف انته رايح تخلص منه مصلحة هى انك تكون جاهز بورقك ويكون بالك طويل وبرضه تبقى ناصح ( مقصدش تغمزه بحاجة لان مش كل الموظفيين زى الافلام العربى ) اقصد تتكلم معاه على ماتش امبارح على الجو اللى مش راضى يتعدل ...كلام عام يخلى فيه شويه ود مش تروح عايز تخلص ورقك ومستعجل وجاى متاخر ( هى الدنيا طارت يا دكتور ) ..مافيش مانع انك تقوله انك شغال ف المكان الفلانى لو احتاج اى حاجة الناس لبعضيها

دا كان الجزء السهل ...الصعب بقى لما تتعامل مع موظف في مكان عملك ... ودى اكتر للناس اللى حتاخد امتيازها في مكان بره الجامعة حيروح مستشفى تانى وحيلاقى دفتر حضور وانصراف (دفتر دفتر مش الكشاكيل اللى بتبقى ف سكرتارية الاقسام عندنا) ويلاقى موظف يمضى منه اخلاء طرف وموظف كاتب فيه شكوى وغيره ... الاساس في التعامل في كل الاحوال هو الاحترام ...هوا بيبقى شايف انك لسه صغير وهوا اقدم منك ف المكان وبيادى خدمه فيه زيه زيك ...انته بتبقى شايف انك دكتور والمفروض ان الكل يسهلك كل حاجة ويساعدك لانك على قمه الهرم الوظيفى ف المستشفى ...الكلام دا مش صح طبعا ...الموظف الموجود وحضرتك المفروض انكم في منظومة واحده لخدمة المريض  وزى ما قلنا قبل كدا ما لا يتم الواجب الا به فهو واجب ..حتقدر تشتغل يا دكتور من غير ما حد يطلعلك مرتبك ..من غير ما يكتبلك كشف الاجازات وجدول النبطشيات .... يبقى خلى فيه مساحة احترام للناس اللى بتشتغل معاك ...مساحة ود ... وف نفس الوقت فيه حدود ...هوا استاذ فلان ...زى ما بتحب الناس تقولك يا دكتور فلان ...حتى لو صغير ف السن دى بتخلى فيه دايما احترام ليك ...مش حتقول لواحد يا استاذ يقولك يا ميدو !!

وعشان يبقى خلصنا الجزء دا فاضل حاجة مهمة انه في حالة ما بيحصل مشكلة بينك وبين حد من الموظفيين او العمال او حتى التمريض . النظام المتبع ف المستشفيات وغيرها هوا انك لو حتمشى قانونى حتكتب شكوى ...طيب حصلت مشكلة وانته زعقت واتفشيت خلاص بس اللى قدامك كتب شكوى .... ببساطة يبقى تكتب شكوى ...طب ليه انا ما غلطتش ف حاجة هوا اللى غلطان وانا زعقتله وحروح اكتب الكلام دا ف التحقيق وخلاص !!! .... من واقع الخبرة ... اى مشكلة ف الشغل بيتقدم شكوى من طرف واحد بيعتبر هوا المجنى عليه حتى ثبوت عكس ذلك لكن لو الشكوى من الطرفين حتعتبر نقطة للتحقيق مين اللى ليه الحق فيهم ...مثال واقعى : واحنا ف امتياز حصل ان الاتوبيس اللى بيودينا الاستراحة اتاخر وماجاش ف معاده والناس واقفه ف الشمس ولما اتصلنا بالسيارات بعتوا السواق اللى مش عارف كان قاعد يحكى فين ..المهم ان واحد من زمايلنا اول ما طلع قاله يعنى ينفع كدا ...واقفين ف الحر دا ولا لاقيين الاتوبيس وانته قاعد بيتحكى ... السواق هاج وقاله انته ما زعقليش ومش حتورينى شغلى وكلام من دا ...زميلنا قاله طيب انا حوريك اعرف اوريك شغلك ولالا ( صيغة تهديد واضحة تدل على شكوى قادمة ) بعد ما روحنا والناس هديت زميلنا قال حصل خير والمسامح كريم ونسى الموضوع ...بعد اسبوع لقى استدعا شئون قانونية عشان السواق مقدم فيه شكوى انه اعتدى عليه بالسب والقذف بابشع السباب بدون سبب !!!! طبعا الشهود ...اللى هما احنا مشكوك ف شهادتنا لاننا زمايله والسواق يا عينى ما كنش معاه حد وزميلنا ما قدمش شكوى ف ساعتها ...الموضوع خلص ودى عن طريق اننا حكينا اللى حصل لمدير المستشفى وهوا فهم اللى حصل ...الخلاصه : لو ناوى على شكوى ما تهوش..اشكى واخلص ولو اعتذر او تبين عكس ذلك ابقى اسحب الشكوى ...لكن ف نفس الوقت ما تكتبش شكاوى على االفاضى والمليان لان بعد شويه رئيس القسم اومدير المستشفى او حتى بتاع الشئون القانونية حياخد باله انك بتاع مشاكل وشكاوى وطول النهار بتتسلى بكدا فمش حتاخد من ورا الشكاوى حاجة خالص

علاقتك بالعمال

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مش حتفرق عن علاقتك بالتمريض و بالموظفيين الا فيه كام نقطة صغيرين

-          العامل مش من مهام وظيفته انه يعملك شاى او يجيبلك سندوتشات الفطار او غيره من الحاجات دى ( خصوصا بره المستشفى بتاعتنا ) يبقى لو حتبعته يعمل كدا لازم دا مايكونش يؤثر على حاجة العمل الاصلى ...مش عشان حتديله جنيه تخليه يغيب ساعة عن القسم الله اعلم حيروح فيها فين وما ينقلش عيان محتاج مثلا ولما حد يقوله يقوله الدكتور كان باعتنى اجيبله سجاير ...دى حيله قديمة بيعملوها وبيلبسوك ف الحيط ...عايز تبعت حد اتاكد ان فيه حد تانى موجود ...وانه مش حيتاخر ... والاحسن انك تجيب حاجتك معاك ( وابقى اديله الجنيه من غير حاجة يا سيدى )

-          احمى المريض من العامل المستغل ...عامل بياخد فلوس من العيان عشان ينزله الاشعه على كرسى او يجيبله بطانيه على السرير .... لو عارف ان فيه عامل كدا يبقى امرك ليه يبقى واضح خد العيان دا على كرسى عشان حالته تعبانه ...عايزين بطانيه زيادة عشان المريض حرارته واطيه ..حاجة زى كدا وبصوت عالى عشان المريض ما يحس شان العامل بيمن عليه بانه بيعامله كدا

-          اياك والتشابك بالايدى مع العمال او التطاول باللسان .. الشكوى والجزاء اقسى عقاب ليهم ...مثال : نزل العيان دا ...لما اخلص مسح الطرقة يا دكتور ...لا الطرقة تستنى العيان تعبان لازم ينزل حالا يالالا .... ماتزعقش فيا انا بشتغل زي زيك ... ما عشان بتشغل زى زيك انا بقولك المريض محتاج ينزل حالا والا حكتب شكوى عشان اخلى مسئوليتى لما تحصل مصيبة ... طبعا الكلام لما بيبقى بصوت عالى ف القسم واهل المريض سامعين مش حيقدر يكمل بجاحة معاك لانه شكله كدا وحش لكن لو نزلت عليه بقى من اول زي زيك بانك مش فاهم حاجة وحمار وابو الطرقة اللى قاعد تمسح فيها و و و و  حتوصل لحارة سد والعيان مش حينزل  .طبعا ساعات ما يقولكش الطرقة يقولك دكتور فلان ( النايب او السينيور بتاعك ) قالى روح هناك كذا ...لو فعلا الحالة محتاجة يبقى ..انزل دلوقتى عشان الحالة مستعجلة وانا حكلم دكتور فلان اقوله انى اللى بعتك ...وكلمه فعلا ... لا شئ يعلوا عن مصلحة المريض وطالما مش باعته يجيبلك سجاير يبقى القانون ف صفك J))

ــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الحلقة الجاية ان شاء الله ..علاقتك بزملائك وزميلاتك ...علاقتك بالناس اللى حواليك

 

 

 

الامتياز : علاقتك بالاخرين ...الحلقة الخامسة

ـــــــــــــــــــــــــــــــــــــــــــــــــــــــــــــــــــــــــ

·         من كلام الأولياء ) اتمام الخير خيرٌ من بدئه ، لأن الاتمام صبرٌ و الابتداء هوى . . و الصبرُ أشقّ من الهوى.

 

نسأل الله الاخلاص

ـــــــــــــــــــــــــــــــــــــــــــــــــــــــــــــ

علاقتك بزملائك وزميلاتك

ــــــــــــــــــــــــــــــــــــــــــــــــــــــــــــ

 

-          اعادة اختراع العجلة

بمعنى انك حتكتشف زمايلك وزميلاتك من جديد ف الامتياز ..بعيدا عن جو المذاكرة الرخيص والناس اللى بتخبى من بعض واللى بياخد كورس ومش قايل واللى الامتحان اسربله وقابل تلفونه والكلام الفارغ اللى شبعنا منه على مدار 7 سنين ... الامتياز الجو اهدى بكتير على الاقل ف الاول قبل ما تبدأ حرب النيابات ( جاى الكلام عليها ان شاء الله ...الصبر) ..... اصحابك اللى طلعوا معاك من السكشن بعد 7 سنين بيتفرقوا ف المجموعات ف الامتياز وكمان ف المستشفيات وبتلاقى نفسك بتشوف وتتعامل مع ناس ممكن ما كنتش تعرف اصلا انهم دفعتك .

 

-          اغتنم الفرصة

زى ما انته حتتعرف على الناس من جديد ..الناس كمان حتتعرف عليك من جديد ...استغل الفرصة دى وكون التغيير اللى بتتمناه ف حياتك ..كنت ف الكلية مدبرس على طول وماشى بالوش الخشب ف السكشن...كنت مهيس ومقضيها والناس واخده عنك فكرة انك مالكش فيها ...كنت مصاحب شويه عيال فرافير اكتشفت ف الاخر انم فهش حد بيقف جنبك بس ما كنتش لاقى غيرهم .... فرصتك للتغيير جت ...ناس بتتعامل معاهم من الاول ومن جديد ...مش بقولك مثل او تظاهر لا بقولك حاجة بسيطة جدا ...عامل الناس زى ما بتحب الناس تعاملك ...عاملهم زى ما بتحب فلان اللى انته عارف ان الدفعة كلها بتشكر فيه سواء موجود او مش موجود ...خليك ودود مع كل الناس ..اتعرف على اسماء الناس اللى ما كنتش تعرف اصلا انهم معاك ف الدفعة وناديلهم باسمائم ودا حيديهم احساس اكتر بالمودة ... سلم على كل اللى بتقابلهم على السلم ف الاستراحة وف المطعم وزمايلك اللى بيجوا القسم اللى انته شغال فيه ف ريكوستات ... ادى الناس رقم تلفونك لو احتاجوك ف اى وقت ... ما تتحججش زى زمان باك مش فاضى او انهم ما يعرفوكش وتعدى من قدامهم ما ترميش السلام ...ما تتلككيش بانك لو عرفتهم سكتك كل واحد مزنوق ف نبطشية حيتصل بيك  ...وانته وراك ايه يعنى ؟ اهوه حاجة بدل ما تروح تقعد ع القهوة زى الموظفيين ولا تروح بلاى ستيشن زى العيال بتوع ثانوى ولا حتى تقعدى ف البيت تتفرجى على مسلسلات تركى ...فيه فرق كبير بين ان يبقى عندى وقت فراغ اقعد فيه ارتاح وأأنتخ شويه وبين ان يبقى عندى فراغ انى مش بعمل حاجة اصلا وبعدين ارجع العن فى البلد والنظام وان مفيش تعليم ولا اهتمام .

 

-          فيه فرق بين البحث والتنقيب

معلش الكلام اللى جاى دا ناشف شويه بس بجد لازم الناس تاخد بالها منه ... الامتياز بالنسبة لناس كتير فترة مناسبة للارتباط ..ماشى ما قولناش حاجة ...بس مش معنى كدا ان كل مرة تشوف واحده زميلتك جايه بريكوست او واحده معاك ف المجموعة نفسها تفضل تتنح فيها وتقارنها بالصورة الافتراضية اللى انته راسمها ف خيالك لشريك العمر ... (الكلام تقريبا بنفس الصيغة مذكر ومؤنث وان كان الصيغة المؤنث بتبقى للنواب اكتر من الامتياز )

مش عيب انك تدور بس العيب ان دا يبقى الطاغى عليك وشويه شويه الناس كلها بتاخد بالها ومنظرك بيبقى وحش اوى ى ى ى 

( طبعا الكلام ان شاء الله جاى على موضوع الارتباط ف هذه الفترة ...الصبر برضه ...خنقتكوا صبر انا عارف بس لازم يبقى فيه عنصر تشويق ليكم .... وعنصر التزام عليا )

 

-          الزميل الاكتيف والزميل الكتف

الاكتيف حلو وبيحمسك انك تتعلم وطول ما هوا قاعد قاعد يرزل على النايب يشرح ويوريك لكن ف نفس الوقت لما بيجى وقت الشغل عايز يشتغل ويشتغل ويشتغل لغايه ما يتقن الحاجة وبعدين يبقى باقى المجموعة تشوف .... الزميل الكتف اللى هوا مديك كتفه وقاعد بيسمع ف الام بى ثرى ومش عايز وجع دماغ وكتير مش بيجى ف النبطشيات اعتمادا على ان انتم فيكم البركة وبتيجوا وبتحضروا وتروحوا ريكوستات L(

 

الاتنين مش كويسين لكن سهل التعامل معاهم ان شاء الله ...الاكتيف ... خليك اكتف منه ( على صيغة افعل ) واسال واستفسر وكدا وكمان خليك احسن منه ف ان يكون بينك وبين النايب علاقة ود ( راجع الحلقة بتاعت النواب ...عشان اللى بيقولى بتكتب زى رجل المستحيل ابقى ما قصرت شمعاه ) ودا حيديك فرصة احسن ف الشغل وف ان النايب يساعدك اكتر ما تشتغل .... طيب الكتف ... دا بسيط جدا ....على حسب القسم اللى انته فيه ...لو قسم فيه شغل والشغل عاجبك ..خلاص قوله يريح وانته حتشيله ويبقى حتشيل الشغل اللى بتحبه بس خلى بالك اكيد حتشيل معاه الشغل الديرتى ( الريكوستات كمثال) ...طيب المجموعة اللى شغاله مش انته وهوا بس فيه ناس تانى ...خلاص يبقى تعملوا جدول مع بعض للنبطشيات ولو فيه حاجات شغل مثلا غرز ف اصابات او غيره يبقى الشغل بالدور بينكم لو هوا مش عايز دوره خلاص ... ف  الاقسام اللى مفهاش شغل وانته مش عايز حاجة زيادة يبقى برضه الموضوع بالدور فيما بينكم او بجدول مكتوب لو  فيه ناس بتزوغ كتير ...سهله دى متهيألى ما كنتش محتاجة تتكتب !

 

-          اللى له قرايب مهميييين ف القسم

برضه من الوارد انك تلاقى حد ليه معرفه ف القسم بيظبطه ف الحضور او ف الشغل ...او تلاقى واحده ( دا الاشهر) بتتجوز ف فترة الامتياز ومش بتيجى الشهرين دول .... نفس الكلام اللى فات ينفع هنا مع ملاحظة : خليك ناصح بمعنى اللى مش بيجى لو ف قسم فيه شغل وانته مهتم ما تسالش عليه ...اهوه بيفضيلك مكان تشتغل ... لو ف قسم مفهوش شغل ... ف العادى النواب بيبقوا عارفين ان دا مش بيحضر او متوصى عليه فمش بيدققوا مع الباقيين ...يعنى حد يكتر معاك ف الكلام حتقوله بكل ادب انا بحضر وعايز استفيد وفيه ناس مش بتيجى خالص .... ف العادى الموضوع دا بيبقى مستفز وبيضايق لكن انا شخصيا ما عمليش مشكلة ..كنت بستغل الموقف بانى بطلب اجازة ودى ف اخر الشهرين وطبعا محدش حيقولك ازاى J انا عارف ان الكلام دا مش صح تماما لكن لغايه ما يبقى فيه نظام حقيقى يخلى كل الناس تحضر ...مفيش مانع انك تستغل الثغرات عشان تشتغل احسن او عشان تأجز يومين ...والله اعلم

 

( لو حد من الادارة قرا الكلام دا وما عجبهوش ...بسيطة ...لو قلت ان الكلام دا ما بيحصلش ومحدش مش بيحضر خالص ...يبقى بالتبعيه النقطة دى مش حيبقى ليها اى اهمية )...عشانا عليك يا رب برضه

 

نقطة اخيرة: حد مش بيحضر بانتظام او مش بيجى ..مشكلتك مش معاه هوا شخصيا ...يعنى مش تتخانق معاه هوا ( مش حقول مثال الحمار والبردعة عشان ما اتحولش لجنة اخلاقيات ) لو حصلت مشكلة او عايز تسجل اعتراضك رسمى قدم شكوى لرئيس القسم او لمدير المستشفى ... مش حتوصل لكدا ....بس مفيش داعى تتخانق مع واحد زميلك حتى لو كان غلطان وف نفس الوقت ما تعاتبش المتسبب الاصلى فى هذا

-          ف الاستراحة

اختار ناس مريحين ف التعامل قدر الامكان وفيه تفاهم ما بينكم عشان تسكن معاهم

لو مخطط تاخد الامتياز كله ف اسيوط يبقى شوف ناس على نفس المنهج تسكن معاها عشان تكملوا السنة مع بعض عشان لو حتسكن مع حد حيمشى بعد شهرين وانته قاعد ممكن تلاقى الاوضه حتفضى شهر وبعدين يجيبولك حد ما تعرفهوش او مش على هواك الشهر اللى بعده وهكذا

 

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الحلقة القادمة (اهم واحده ) علاقتك مع المرضى

ــــــــــــــــــــــــــــــــــــــــــــــــــــــــــــــــــــــــــــــــــــ

ملاحظات سريعة :

شكرا جدا لكل واحد بيعمل لايك او بيعلق ان الكلام عجبه ...دا شئ بيسعدنى ويساعدنى انى استمر لما احس ان الناس بتستفيد من الكلام دا

ناس كتير اقترحت انى اجمع الكلام على بعضه واحطه ف ملف ورد على الصفحة او اعمله كتيب ...انا مبسوط اكتر بتفاعلكم مع الكلام والردود على الموضوعات اللى بستفيد منها كتير

ان شاء الله لو فيه فرصه ممكن ننظم مع بعض وخلى فيه مرات لقاءات مفتوحة للكلام ف االامتياز وسنته J)) تحياتى

                                     

 

الامتياز : الحلقة السادسة

ـــــــــــــــــــــــــــــــــــــــــــــــــــــــــــــــ

علاقتك بالمرضى

ــــــــــــــــــــــــــــــــــــــــــــــــــــــــــــــ

-          انا امتياز

بتلاقى دايما الناس ف الجرايد او لما يكونوا مخنوقين من مستشفى يقولك مفيش دكاترة وكل اللى ف المستشفى "بتوع الامتياز" طبعا الكلام مش صح وللاسف الصحب يبقى انه شاي فان كل الدكاترة الموجودين في مستوى الامتياز بمعنى اخر لسه بيتعلم ... لكن عارف ليه المريض او المرافق بتاعه بيجيله الاحساس دا ؟ ايه اللى بيخليه يشك ف الدكتور اللى بيعالجه – واللى يهمك ف الموضوع ..ليه يبقى الامتياز هوا المثال للدكتور الوحش L - ؟؟؟؟؟

المريض او المرافق مش بيتعرف عليك من خلال الروشته اللى بتاخد يوم او يومين بالعلاج عشان تجيب نتيجة او لا ...مش بيتعرف عليك من عينة غازات بالدم سحبتها منه او بذل عملتهوله ...طبعا دا مهم بس صدقنى لما تتعامل مع مرضى كتير حتكتشف ان المرضى وبالذات في مصر اكتر حاجة بتفرق معاهم هى التعامل ...طريقة التعامل ... وقدرتك على انك توصله معلومة صح ..." يا عم دا العيانين بتوعنا غلابة ولو قلتله عندك كذا حيموت منك " .....لا مش ف كل الاحوال وحتى لو مريض كبير  ف السن وانته قلتله كلمتين كويسين بتبقى محتاج تقول لاهله ايه مشكلته بالضبط ..." يعنى انا حشتغل واشوف العيانيين اللى ورايا ولا افضل اشرح لدا ودا يجيب دا وفلم بقى " اولا الشرح دا جزء من عملك ..تخيل نفسك مكان المريض اللى مش فاهم حاجة خالص ...او اقولك .. تخيلك نفسك دكتور مفيش كدا والكهربا ف البيت عندك ضربت وجيبت كهربائى بصلك من فوق لتحت وبعدين بص لسكينة الكهربا وقالك " السلك اللى ف الاوضه اللى جوه عايز يتغير ..ابعتلى حد يشترى سلك 2 مم " بذمتك مش حتحب تسأله دا من ايه وايه اللى حصل طيب نعمل ايه عشان الموضوع دا ما يتكررش ولما حنغير السلك الكهربا حترجع تانى ف باقى الشقة ازاى ؟ ....الكلام دا ف سلك كهربا لو اتزنقت فيه حتجيب كشاف او تروح تبات عند حماتك فتخيل بقى لما واحد يبقى جايبلك ابنه او ابوه ويقولك الحقنى تبص عليه من فوق لتحت وبعدين تقوله عنده ضغط يقولك اه ..ممممم طيب اعمل اشعه وتعالى ...طيب يا بيه هوا فيه ايه ...خلاص بقى ما تلتش كتير اعمل الاشعه وخلاص !!!!!! فيه ناس بتفتكر انك بتبقى دكتور كبير ومهم لما تتكلم كلام قليل وتعامل الناس بانفه وتبص على العيان بنص عين ... فيه ناس كدا فعلا اه لكن كون انته التغيير اللى انته عايز تشوفه ..كون انته الدكتور اللى لما يدخل كل الناس تبقى مبسوطة ان دكتور فلان استلم الشيفت ...دا مش سهل على فكرة بس لزم تتعود عليه من اول حياتك العملية ... لان كل ما حتكبر كل ما مشاغلك ومرضاك ومسئولياتك ما بتكبر وكل ما بتبقى عايز تخلص بسرعة ومش عايز كلام مكرر كتير " افتكر دايما ان المريض اللى كتبتله اشعه وسالك فين الاشعه مش هوا نفس المريض اللى قبله ولا اللى قبله ...انته بتزعق فيه وتقوله اسال العامل اللى على الباب كانه هوا هوا اللى كرر السؤال ...مع ان السؤال كدا طبيعى بالنسبة لمريض اول مرة يجى لكن عشان انته سمعت السؤال 10 مرات من الصبح فزهقت " 

اكتر المشاكل اللى بتحصل ف المستشفيات وخناقات الناس مع الدكاترة بتجى من النقطة دى تحديدا ...هوا بيجى ملهوف ..حضرتك بتعامله وحش حتى لو عملتله المطلوب ومش بتفهمه فيه ايه ..بيحصل للمريض مشكلة ..بيطلع غيظه فيك ..لكن لو حبينا نكتب السيناريو بشكل اخر ... واحد داخل عليك الاستقبال شايل ابوه وبيقولك الحقنى ..انته قمت بسرعة من غير ما تتاوب قبلها وبصيت عليه لقيت  راجل شكله 80 سنة كدا وبيقولك عنده فشل كلوى وبيغسل و و و و  الراجل قدامك ازرق ..قلتله من امتى وهوا كدا قالك لسه كان بيكلمنى واحنا داخلين ...عملت اسعافاتك وناديت على التمريض وجيبت محاليل وانته بتعمل دا كله بتقوله ... واضح ان حصله هبوط شديد وقلبه وقف بس احنا حنحاول نساعده ..ادعيلنا وهات تذكره بسرعة على بال ما نعمل اللازم ...هوا شافك بتعمل ايه وفهم انه انتهى بس الامل لسه موجود ...الراجل بقى كويس يبقى الحمد لله وعملت اللى عليك ..الراجل اتوفى ..والله حاولنا نسعفه لكن واضح ان قلبه ما استحملش والبقاء لله ... من غير الكلمتين اللى فالنص بيبقى المرافق بيغلى بقى " دا انا داخل بيه بيكلمنى " وكان كل الامراض اللى عنده والسن وقبل كدا دا قضاء الله مش عاجبه ..ملحوظة : ممكن تعمل دا كله وبرضه تحصل مشاكل L

 

-          الامتياز مش عيب

فيه كتير بيحب يخبى البادج بتاع طبيب تدريب او لما يشوف مريض يتقمص دور النايب او الدكتور الكبير ولما يساله حاجة مش عارفها يقوله بس انته بس اسمع الكلمتين اللى بقولهملك دول وتاخد العلاج وان شاء الله زى الفل ..انته مش البادج ولا التصنيف اللى انته محطوط فيه ..انته عملك ...يعنى لو انته اتكلمت مع العيان بهدوء ووصلت لتشخيص وكتبت علاج وشرحتهوله يبقى انته كدا دكتور شاطر ..اىان كان تصنيفك ...طيب سالك على حاجة ما عرفتهاش ..ما تتكبرش " ثوانى كدا وراجعلك ... " واروح اسال النايب اللى معايا ..طيب النايب زوغ ..اتصل بيه ...ولا تحب تقوله مفيش مشاكل ويطلع ما ينفعش ياخد العلاج دا اصلا ويرجعلك بعد نص ساعة ميت !! طيب سالك على حاجة وما عرفتش تطلع منه .. والله ناخد راى دكتور فلان ف الموضوع دا عشان هوا اللى متابع حالتك او عشان هوا اللى كان ف عمليتك ... ابدا مش عيب ...العيب انك تعمل عارف وانته مش عارف حتى لو عدت على خير

-          العلاقة العكسية

مع اول الامتياز بتتغير العلاقة العادية ما بينك وبين المريض ...المريض اللى كنت بتجرى وراه وانته طالب عشان تشوفه بقى هوا اللى بيجرى وارك عشان تفحصه واللى كنت بتكرمشله العشرة جنيه عشان يسيبك تاخد هيستورى بس بقى بيدفعلك كشف او بيقطع تذكرة عشان تسمع الكلمتين اللى تعبينه ...حاول تحافظ على نفسك زى ما كنت وانته طالب ... افتكر انك لسه بتتعلم وكل عيان عايزك تشوفه شوفه ..كل ما تشوف اكتر كل ما حيبقى عندك خبره اكتر ... يعنى لما ادخل العنبر وكل واحد م العيانين القدام عارف انى انا اللى بيقيس الضغط يمديلى دراعه اقعد اقيس انا ضغط هوا دا الفحص اللى انته عايزه ... اه ..قيس ضغطه وقولهوله وقوله ورينى كدا وافحصه فحص كامل ...اتعود انك لما تشوف عيان تجيبه من فوق لتحت زى ما الكتاب بيقول مش مجرد ضغط ونبض وسلام ..اولا عشان تتعود على كدا باقى حياتك وما تبقاش حاجة "ميسد " منك ...تانى حاجة عشان كل ما حتفحص مرضى اكتر كل ما ايدك حتاخد وودنك حتسمع وعينك حتلاحظ وبعدين عندك تذاكر المرضى وتحاليلهم شوف ايه اللى لقيته وقارنه ...دا كله باعتبار ان معكش حد من النواب  ..طيب ربنا بعتلك نايب كويس ..اشوف واروح اساله ...بلاش نظام السكاشن بتاع زمان ..حد يجيبك العيان ويجيب سماعه ويحطها على صدره ويقولك اسمع هنا بان سيستولك مش عارف ايه ... وانته بقى تتخيل ايه اللى بتسمع ..اسمع الاول حاول تحط احتمال دا ايه وبعدين سال النايب وقارن الكلام ..دا غير انه حيحسن مهاراتك كمان حيديك ثقه بالنفس وقدره على اتخاذ القرار ..دا ايه ؟

-          اتصرف بدون تهور

مريض جاى قدامك حالته صعبه وانته ف مستشفى جامعى ..احسن حاجة حتعملها انته تجيب النايب بسرعة وتقف جنبه تشوفه بيعمل ايه ..لا ف مستشفى مركزى والنايب نايم فوق ف الاستراحة ف الخامس ... ابعت حد يجيبه بسرعة وركب للعيان كانيولا " كدا كدا حيعوزها " او ابتدى اسعافات لغايه ما يجيلك ... لا عيان ف البيت اللى جنبك وصحوك بالليل الحقنا .... شاكك فيه ؟ انقله مستشفى قريب بسرعة ...حاجة بسيطة "افتكر دايما محدش بيصحى حد ف عز الليل عشان حاجة بسيطة " افحصه كويس وخد هيستورى محترم لو فعلا بسيطة اكتبله علاج بس روح كمل نوم واول ما تصحى بص عليه تانى ... جيران وناس ف الوش مش حيبقى كويس لو فيه مشكلة حصلت

-          السمعة الطيبة

واحد طلب منك تيجى تشوف حد تعبان ف البيت  " الكشف المنزلى 100 جنيه حضرتك !!! " ....الفلوس مهمة بس عمر ما كشفك هوا اللى بيحدد اهميتك او مستواك " عارف حتقولى بص حواليك .. بس زى ما اتفقنا كن انت التغيير الذى تريد ومن وانته صغير ..لان الحاجات دى على كبر ما بتنفعش " ... الاحسن انك يكون الدافع بتاعك هو انك تشتغل وتاخد خبرة وصدقنى الفلوس حتيجى ف السكة لكن لما بتبقى عينك على جيب المريض مش على اللى واجعه ف الاغلب مش بتشخص صح وبرضه بيبان عليك للاسف وبيبقى شكلك وحش او و و ى

-          العيان ابو بلاش والعيان ابو فلوس

شغال انته ف مستشفى وعامل شغل كويس ..واحد عرض عليك يوم ف مستوصف قريب كدا وحيطلعلك منه ملبغ مش وحش ...اولا : اتاكد انك تقدر تعمل الموضوع دا بشكل مضبوط وانك مؤهل انك تشيل مسئولية مرضى "قانونا لا يجوز لكن واقعيا دا اللى بيحصل " ..ثانى حاجة :روحت واشتغلت والناس عجبها شغلك ووسعت معاك العملية ... ما تجيش على حق المستشفى اللى انته شغال فيها ..." يا عم دى مش جايبه همها " ما هو همها مش فلوس ..همها هوا السمعة الكويسة اللى خليتهم يقوللك تعالى اشتغل ف المستوصف  ... همها هوا العيانين اللى كنت بتشوفهم وادولك خبرة خليتك تعرف تتعامل مع اللى زيهم ف نفس المرض ...همها ان المرتب الهزيل دا هوا مرتب مش قصاد شغلك ...شغلك قصاده مرتب وقصاده تعليم وخبره انته بتبنيها

 

الخلاصة :

-           المريض محتاج لعلاج دوائى او جراحى بس قبله محتاج إلى دعم معنوى

-          المرافق اللى بيقولك "طمنى يا دكتور" بيطلب منك ضمنا ان كلامك يبقى مبشر ..ماشى لكن لو لازم ف نفس الوقت يبقى عارف ان فيه خطورة او فيه مشكلة عشان لو حصلت مضاعفات او وفاة يبقى فيه تمهيد للموضوع

-          انته بمستواك وشغلك مش ببادجك وسماعتك الليتمان

-          لا تستهين بالمستوى الفكرى للمريض ... انته قائد ف المجتمع والمفروض انك توضح الصورة للمريض كويس .. وبعدين " التلفزيون ما سبش حد عبيط "

-          ف المواقف الصعبة ...مش عيب تاخد راى حد تانى مهما كانت الضغوط

-          ف الامتياز الطبيب بيبقى متعاطف مع المرضى فعلا لكن التعاطف دا بيضمحل لما بيبقى نايب وعليه شغل كتير ومطلوب منه اكتر ..حافظ على تعاطفك وتعاملك الكويس إلى ما بعد الامتياز ...لو اتعودت عليه ف الامتياز حيبقى اسهل انك تكمل بيه

-          استفيد من كل مريض بيمر عليك حتى لو ف تخصص انته مش ناوى عليه ... الدكتور الشاطر متخصص اه لكن عنده فكره عن باقى التخصصات

ــــــــــــــــــــــــــــــــــــــــــــــــ

كفايه كدا المرة دى .... الامتياز الحلقة السابعة : الخطة الزمنية لكل شهرين ... الهدف المرحلى " ان شاء الله"

 

 

الامتياز الحلقة السابعة

ـــــــــــــــــــــــــــــــــــــــــــــــــــــــــــــــــــــــــــــــ

الامتياز : الهدف المرحلى

ـــــــــــــــــــــــــــــــــــــــــــــــــــــــــــــــــــــــــــــــــ

حتى انت يا بروتس

واحنا اللى كنا بنقول عليك بتتكلم ببساطة حتقول كلام كبير زى الجماعة بتوع الجودة ...هدف مرحلى كمان شويه تقولى معايير اكاديمية وحوكمة ... الكلام مش كبير ولا حاجة كل ما تعرف معنى كلمة حتلاقى انها سهلة وبعدين ما الناس بتقول ع القهاوى حكومة تكنوقراط ورئيس توافقى وغيره ..جت عليا ؟ ...الهدف المرحلى المقصود منه باختصار : على اخر الشهرين دول حتكون عملت ايه ؟...بس كدا لا اكتر ولا اقل ... الفكرة من الهدف المرحلى والهدف الاسمى او الاكبر هى ان كلنا هدفنا النهائى او الاكبر او الاسمى هوا اننا على اخر الامتياز نبقى دكاترة ممتازين مش امتيازيين وف التخصص اللى حبناه نبقى مشروع دكتور شاطر لكن عشان تعمل كدا لو سيبت نفسك حتلاقى يوم بياكل يوم واسبوع بيسلم اسبوع وراوند بيجيب اخوه والسنة خلصت وانته ما عملتش حاجة غير رحلة لشرم وماتشين بلاى ستيشين ...طيب الحل احط هدف لكل مرحلة اللى هى ف الامتياز بتبقى تقريبا كل رواند يعنى كل شهرين ...تمام كدا ؟  لا ... هوا صحيح هدف مرحلى لكن مش هدف واحد لازم توسع لنفسك المجال ...احط لسته ؟...لا برضه عشان لو ما قدرتش تعملها حتتضايق وتتعقد وما تعملش هدف الشهرين اللى بعدهم ....طيب تعمل ايه ؟

 

انا فين ؟

لو بتوه ف الشارع وتتصل بحد ف التلفون تقوله انك توهت وانته رايحله بيقولك ايه اول حاجة : انته واقف فين دلوقتى ؟ وعلى اساس انته فين بيقولك حتكمل ازاى عشان توصله ...نفس الكلام ...اول حاجة تتعمل انك تقعد مع نفسك ( راجع الحلقة الاولى ) تكتب انته عايز ايه من الشهرين الجايين دول ...دا التخصص اللى بحلم بيه يبىقى حرمى نفسى ف الشغل وكمان حذاكر فيه شويه ..دا تخصص مش بفكر فيه بس مهم ليا كدكتور يبقى حركز انى استفيد منه اخر حاجة ...دا تخصص مش عايزه ومش مهتم بيه حبقى على مستوى الحد الادنى بتاعه ووراه حاجات تانى اعملها اهم ؟ .... انته عايز ايه ؟

 

طب هما عايزين ايه ؟

سواء مهتم او غير مهتم ...كطبيب ناجح ف المستقبل لازم يبقى عندك حد  ادنى من المعلومات عن التخصص دا اى ان كان هذا التخصص واى ان كان اللى بتفكر فيه لبعدين ... وعشانكدا لازم تشوف اللى ف لتخصص دا عايزين منك تعرف ايه ؟ ودا طبعا حتلاقيه ف الكراسة بتاعت الامتياز .... دول كاتبين فيها كلام كبير قوى مش بيتعمل ... حتى لو الكلام دا صح لازم تشوف ايه اللى مكتوب ف الاول مش تستنى لما الراوند يخلص وتيجى تمضى الكراسة تقوم تقول ياااه دا انا المفروض كنت اتعلم كذا ... افتح الكراسة وشوف هما كاتبين عايزين منك ايه ...لو انته عايز التخصص دا ... خلص اللى مكتوب وادخل على اللى اعلى منه ...لو مش مهتم قوى ...حاول تعرف ايه اهم حاجة من الكلام دا ممكن تستفيد منها "بسؤال النواب مثلا" عشان تحط خطة للشغل بتاعك

 

طيب انا عايز وهما عايزيين وحطينا خطة ...نص الاجابة

الدنيا عموما مش علم وشغل وبس ...والامتياز زى كدا تمام ... انته ف الاول بتشوف خطة العمل ف القسم وبعدين على هذا الاساس بتحدد انته حتعمل ايه ...حتشتغل ف القسم ...حتعمل انتداب فترة لقسم تانى انته عايزه .... حتقضى المطلوب وحتفرغ نفسك لمذاكرة معادلة وهكذا ...لكن فاضل تحدد انته عايز ايه تانى ...كنا اتكلمنا قبل كدا على انك تستحق بعد 7 سنين تعب انك ترفه مش مجرد تنام ...انته تاخد راحة من المذاكرة الاجبارية لكن ممكن تسلى وقتك وتستفيد ...خد دورة لغة لو شايف نفسك محتاج لغة تانية او دورة انجليزى لو شايفه صعيدى شوي هاو خلص الاى سى دى ال ...اهى كدا كدا حتعوزها ف اى حته حتروحا ... عايز تتعلم وتلعب اسكواش ...شوف نفسك عايز ايه تانى غير الطب والشغل ...ما تبصش على الوقت الفاضى الاول وبعدين تجيب حاجة على مقاسه ..الوقت اللى بيضيع كتير ...فكر ف الحاجة اللى عايز تعملها الاول لو عندك دافع قوى ليها حتوجدلها مكان ف جدولك وحتعرف توفق اوضاعك ونبطشياتك على هوايتك او نشاطك اللى قررت تدخل فيه

 

انا مش بتاعت الكلام دا

دا انا ما عملتهاش ف الكلية وولا مرة حطيت جدول مذاكرة ومشيت عليه ..حعملها ف الامتياز مع الرحرحة ؟

ايوه ...لو حسبتها صح ...بمعنى انا الشهريين دول التخصص اللى بحبه وعايز العب اسكواش وعايز اخد كورس فرنساوى ووعدت زميلى اشيله ف المستوصف و  و  و  و ...مش حينفع .... انا قلت فكر ف الحاجة اللى عايز تعملها الاول مش ف الوقت الفاضى لكن ف نفس الوقت لازم ترتب اولويات ....يعنى الكورس والاسكواش ممكن ينفعوا ف اى شهر لكن التخصص اللى بتحبه هما دول الشهرين بتوعه ..ممكن التخصص يشيل معاه حاجة كمان لكن ما ينفعش يشيل 4 !!!!....يبقى بعد ما حقعد مع نفسى واشوف عايز ايه وهما عايزين منى ايه واحط خطة ...ارتب اولويات الخطة دى

 

ابدا بالبسيط

اختار ف الاول حاجات سهله تعملها تحس نفسك انجزت ... ماتعقدش نفسك من الاول بجدول ضيق ومزنوق ....اعمل حساب للظوارى ...

 

حاول تقييم كل اسبوع

هو الهدف كل شهرين لكن حاول تشوف مدى تقدمك فيه كل اسبوع بدل ما تستنى لغايه اخر الشهرين عشان تقول ما لحقتش اعمل كذا وكذا وكذا

 

اللى ماتعرفوش احسن من اللى تعرفه

اللى ماعندكش فيه معلومة قبل كدا حيبقى احلى انك تبتدى بيه ...لانه حيحسسك بانك فعلا بتكتسب جديد غير اللى عندك عنه معلومه وانته بتحاول تحسنها وتخليها خبره  ...المعرفة تسبق الخبرة

 

خلى عندك صبر ...خلى ايمانك قوى ...ما تخدش الامور ببساطة ....لو عايز تبقى حاجة بجد ....ما تفكرش زى ما كل الناس بتفكر ....ما تحبطش كتير وتنام .... لو شايف انك جواك حاجة قويه وعبقرية ...حاول تطلعها لانك لما بتعمل كدا مش بتكسب قدام الناس قد ما بتكسب ثقتك بنفسك قدام نفسك ...للحديث بقية ان شاء الله

 

ملاحظات سريعة :

بالرغم من ردودكم الجميلة على الحلقات والرسائل الخاصة على الانبوكس من استفسارات خاصة او تعليقات الا انه مازال فيه ناس في كلامها كمية احباط كبيرة وكمية ثورة كلامية دون فعل من نظام " الظلم والفساد والمعاملة السيئة والريكوستات وغيره " كما قلت الدنيا مش وردى ...وهذا الكلام لس ا سحرية تقلب الامتياز إلى جنه لكن محاولة لشرح ما يحدث عشان الناس تنتبه ليه قبل ما تقع فيه زى ما وقعت فيه انا زمان ..حاول تكون احسن ...تكون متميز ...لانك تستحق هذا .......تحياتى

 

الامتياز  الحلقة الثامنة

ـــــــــــــــــــــــــــــــــــــــــــــــــــــــ

الطريق بعد الامتياز

ـــــــــــــــــــــــــــــــــــــــــــــــــــــ

اسكيم!

ـــــــــــــــــــــــــــــــــــــــــــــــــ

اسكيم او مخطط بالعربى ...من الحاجات اللى دايما كنا بنستخدمها ف المذاكرة عشان نفتكر موضوع او عشان نفتكر عناصره الاساسية على الاقل ... النهاردة فكرت ان  موضوع ماذا بعد الامتياز يحتاج إلى اسكيم فعلا بس عشان رسمى من حلو حكتب الكلام واتخيل معايا الاسكيم

طبعا كل الكلام اللى جاى ان شاء الله حيعتمد على الحلقات اللى فاتت من حيث قعدتك مع نفسك واختيارك لاولوياتك وترتيبك لفترة الامتياز وتجربتك لنفسك ف بعض الاقسام والمواقف عشان تقدر تحكم انته عايز ايه من الطرق الكتير دى

ــــــــــــــــــــــــــــــــــــــــــــــــــــــ

اشتغل بعد الامتياز : ف الطب ولا مش ف الطب

ـــــــــــــــــــــــــــــــــــــــــــــــــــــــ

ف الطب يعنى حتفضل الناس تناديك دكتور وحيفضل ليك علاقة بالمهنة من خلال تعامل مباشر او غير مباشر وحتفضل تستخدم نفس المصطلحات اللى طول اليوم بتقولها وبتسمعها ودى نقطة فيها تفصيل كتير .... الاسهل منها هى نقطة مش طب .... يعنى حاجة بعيدة خالص عن الطب زى تشتغل كاتب او فنان ...رسام .... صاحب اجنس عربيات ...ما تضحكش فيه ناس كتير مش بتلاقى نفسها في الطب وبتلاقى نفسها ف حاجة تانى ...مش عيب ابدا ...العيب انك تفضل باقى حياتك مشتت مش عارف تاخد قرار ...لا انته حصلت دكتور شاطر ولا حصلت مش دكتور مرتاح ...النقطة الاساسية هنا هى انك تعرف الفرق بين ان الكتابة تقى هوايتك وانها تبقى مهنك ...بين انك مش مبسوط ف الكلية عشان الضغط اللى بتتعرضه وبين انك كارهه الطب بكل صوره ....نصيحة للى عايز ياخد الطريق دا يحاول ف فترة الامتياز يجرب نفسه ويشوف هوا فعلا يقدر "يكسب قوته" من العمل خارج المجال اللى درس فيه 7 سنين وهل حيحتاج دراسات تانى ف الحاجة اللى عايز يكمل فيها وحيمول نفسه ازاى عشان يكمل فيها سواء مشروع او دراسه

ــــــــــــــــــــــــــــــــــــــــــــــــــــــــــــــــــ

طيب ف الطب : دكتور ولا طبيب

ـــــــــــــــــــــــــــــــــــــــــــــــــــــــــــــــــــ

طيب ما الاتنين واحد ؟ لا ...انا هنا اقصد بطبيب اللى حيشتغل ف علاج الناس او تشخيصهم ...اومال دكتور؟ دى للى حيشتغل حاجة "تبع" الطب بس ملهاش علاقة بالمرضى ولا بالعلاج ...بمعنى يشتغل مندوب دعاية ... شركة مستلزمات طبية ....شركة تنظيم مؤتمرات طبية ....مصنع مستلزمات طبية برضه ...وحاجات زى كدا كتير بتعتمد على ان اللى بيشتغل فيها بيكون دكتور وبيستخدم " جزء " من اللى اتعلمه ف الكلية ف شغله لكن بدون احتكاك بالعملية العلاجية ولا التشخيصية للمرضى ولا الدخول في عمليات التطوير المرحلى لاى طبيب من ماجيستير ودكتوراه وخلافه .... فيه ناس بتضيف للكاتيجورى دا "ادارة مستشفيات" باعتبارها بره العملية الاساسية ف المستشفى ومعظم الشغل ادارى لكن ف الاغلب اللى بياخد السكة دى بياخدها بعد فترة من الشغل كطبيب بانه بياخد دورات ادارة مستشفيات " غاليه اوى على فكرة عشان اللى ناوى يحوشلها من دلوقتى" وبعدين بيبتدى يقدم على الشغل الادراى .... المهم ان اللى بيفكر ف الطريق دا ف العادى بيبقى عايز يفضل ف المجال لكن مش عايز وجع الدماغ ولا المسئولية الادبية عن المرضى ...مرة تانى مش عيب انك تشتغل كدا المهم انك تكون ناجح ف المجال اللى تختاره والنقطة التانية ان كل الوظايف دى مهمة ومن غيرها مش حتعرف تشتغل "سيبك من الاستايل القديم بتاع الدكتور ابو سماعه "

ـــــــــــــــــــــــــــــــــــــــــــــــــــــــــــــــــــ

مممممم ف الطب وطبيب : مباشر ولا غير مباشر

ـــــــــــــــــــــــــــــــــــــــــــــــــــــــــــــــــــ

مباشر ولا غير مباشر ف التعامل مع المرضى ...مباشر زى دكتور الباطنة والجراحة والنسا والعظام وغيره ...غير مباشر اللى بيتعامل مع المريض عن طريق "ريكوست" من طبيب اخر زى طبيب التحاليل وطبيب الاشعة وطبيب التخدير ..طبعا دى تقسيمه من مضبوطه قوى لكن انا استخدمتها بس للتسهيل على نوعية العمل اللى انته بتدور عليه ....ف الكل حتبقى بتتعامل مع المريض وف الكل حتبقى متحمل مسئولية ادبية وانسانية ناحيته  و ف الكل حتخدم المريض والعملية العلاجية الفرق بس ف شكل التعامل وشكل المكان اللى حتشتغل فيه " حوادث الجراحة ولا معمل ؟ استقبال عام ولا اوضه عمليات ...الميزة التانية للتقسيم هدى انك حتلاقى الطبيب الغير مباشر وقف معاك ف التقسيم عند كدا وحيكمل معانا الطبيب المباشر

ـــــــــــــــــــــــــــــــــــــــــــــــــــــــــــــــــ

كفايه يا عم ف الطب وطبيب ومباشر : كشكول ولا تخصص

ــــــــــــــــــــــــــــــــــــــــــــــــــــــــــــــــ

زمان كان فيه ناس كتير من اللى بيتخرج من طب مش بيحب انه يحضر ولا يتخصص ف حاجة  وكان بيحبوا قوى يشتغلوا ممارس عام وخصوصا الناس اللى كانت من مدن صغيرة مفيهاش دكاترة اصلا اول ما بيخلص بيروح بلده ويشتغل هناك ويبقى "داكتور الناحية " وحتى الان فيه ناس كتير كدا ومبسوطة جدا على الوضع دا وفيه منه اللى شاطر جدا لممارس عام وبيعرف امتى وفين يبعت المريض اللى محتاج مستوى اعلى من الرعاية ...دلوقتى طلع دكتور كشكول جديد وهو طب الاسرة واللى بيشتغل فيه كممارس عام بيهتم بالمشكلات الصحية العامة وعلى نطاق المجتمع بمفهومه الصغير ...ناس كتير بتقبل على انها تاخد زمالة طب اسرة ف الصحة ...لانها لغايه وقت قريب كنت ممكن تاخدها من اول يوم ف التكليف ...وتتنقل مكان كويس واول ما تخلص تقدر تسافر بيها بره مصر ف الخليج لانها مطلوبه جدا الفترة اللى فاتت ...طب الاسرة ما تعتبرش كشكول زى زمان لان الناس اللى بتاخدها دلوقتى بتذاكر وتمتحن زمالة وكمان بتحدث معلوماتها اول باول ...الفكرة فيها للى ف الصحة انها سريعة ف التسجيل وفرص السفر بيها اسهل من غيرها " مع ملاحظة ان الكلام دا الايام دى ...ما تعرفش بعد 3 سنين على بال ما تكون خلصت الزمالة حيكون الوضع ايه بره ...فما تبنيش اختيارك للتخصص على نقطة واحده بس "

ـــــــــــــــــــــــــــــــــــــــــــــــــــــــــــــــــــــ

L((( طب وطبيب ومباشر وتخصص ....خلص بقى : باطنة ولا جراحة ولا لا شئ مما سبق

ـــــــــــــــــــــــــــــــــــــــــــــــــــــــــــــــــــــــ

برضه التقسيم هدى كانت زمان اكتر من دلوقتى ...زمان كان يقولك انته ايدك حلوه ادخل جراحة ....اول لسانك طويل فادخل .......:) او بتذاكر كتير فادخل باطنه ....الكلام دا دلوقتى مش مضبوطه برضه اوى لان الجراحة فيه منها جراحات كتير معظم شغلها ناحيه علاجية اكتر منه جراحية ....والباطنه فيه منها شغل تداخلى "interventional " زى القسطرة والمناظير وغيره كله شغل ايد مش مجرد ازاى توصل لتشخيص ...وفيه اللى لا باطنه ولا جراحة زى التخصصات الجديدة ف الصحة زى طب الطوارئ والحالات الحرجة واللى بيشمل حاجات باطنه وجراحة مع بعض او علاج الالام وغيره من التخصصات اللى التصنيف دا مش بينفع معاها قوى ...لكن برضه الغرض من التقسيم انك توصل انته اتجاهك العام ايه ...ميال ناحية التخصصات الجراحية ولا الباطنية وايه اللى تقدر تتابع فيه "فيه واحد عنده استعداد ينزل ف نص الليل ف الشتا عشان يعمل عمليه او يشوف مريض مستعجل لكن زميله مثلا ما بيحبش حد يقلقه او عارف ان نومه تقيل فعاوز حاجة مفهاش طوارى كتير زى الجلدية او العلاج الطبيعى كمثال"

ــــــــــــــــــــــــــــــــــــــــــــــــــــــــــــــــــــــــــــــــــــ

دا كان عرض للتخصصات وعشان مانتوهش جوها عملنا اسكيم صغير مش الغرض منه التقسيم بقدر ما الغرض منه توضيح الفكرة الاساسية لكل تخصص وبعدين كل واحد فاكر او شايف نفسه ف تصنيف معين يبتدى يبص ف التخصصات اللى جواه ويشوف ايه اللى يقدر يمشى فيه منهم ....مش كل التقسيم صح ...مش كل السمات اللى ذكرتها للاقسام ثابته هى مجرد خطوط عريضه عشان تبتدى تدور بنفسك وترسم " اسكيمك " بايدك

الحلقة الجاية ان شاء الله : بعد اختيارك "طبيب " وبعدين التخصص اى ان كان ....حاخد التخصص فين ؟ وازاى ؟( اماكن الشغل بره وجوه الجامعة وبره وجوه مصر "

تحياتى

 

 

الامتياز الحلقة التاسعة : الطريق إلى التخصص

اسكيم ...برضه !

ـــــــــــــــــــــــــــــــــــــــــــــــــــــــــــــــــــ

زى ما اتكلمنا المرة اللى فاتت عن الطريق بعد الامتياز وازاى اختار التخصص يبقى لازم عشان نكمل الكلام نتكلم حتلاقى التخصص دا فين وازاى تمشى ف سكة تخصص بعينه وبرضه حنستخدم الاسكيم

ــــــــــــــــــــــــــــــــــــــــــــــــــــــــــــــــــــــــــــــ

جوه الجامعة ولا بره الجامعة

ــــــــــــــــــــــــــــــــــــــــــــــــــــــــــــــــــــــــــ

طبعا الجامعة بتديك فرصة لمعظم "مش كل " التخصصات اللى ممكن تفكر فيها وبقول مش كل لان دلوقتى فيه تخصصات موجوده بس ف الصحة او موجوده ف جامعات تانى مش عندنا ف اسيوط زى طب الطوارى وطب الاسرة وحاجات زى كدا لكن ف نفس الوقت معظم التخصصات موجوده داخل الجامعة للى ليه فرصة انه يدخل الجامعة ...طيب فرصتك في دخول الجامعة حتكون ازاى ( انته خلال محدد التخصص من المرة اللى فاتت انته بس بدور على مكان كويس تتعلم فيه او تشتغل وتكمل فيه)

ــــــــــــــــــــــــــــــــــــــــــــــــــــــــــــــــــــــ

نايب عادى ولا زاير ؟

ـــــــــــــــــــــــــــــــــــــــــــــــــــــــــــــــــــــ

النايب العادى ودا اللى بياخد نيابة "طبيب مقيم" عن طريق كتابة الرغبات في شهر يناير من كل سنة وبيكمل فترة النيابة اللى كانت 3 سنين ودلوقتى ممكن تتمد إلى 5 سنين في الجامعة وبعدها يا اما بيتعين في الجامعة معيد ويكمل ف السكة دى يا بيطلع للصحة " خلى بالك من بعدها دى ...يعنى اه ممكن تبقى عامل كل احتياطاتك عشان تضمن انك تتعين لكن ما تعرفش ايه حيبقى شكل القسم والناس اللى فيه بعد 3 سنين من دلوقتى عشان كدا لازم دايما تبقى حاطط احتمال حتى لو صغير انك ممكن تكمل بره الجامعة .... الطريقة التانية جوه الجامعة هى النائب الزائر ودا عشان تاخدها بتقدم على طلب للقسم اللى انته عايز تدخله ودا النظام القديم اللى دلوقتى عايزين يغيره عشان يبقى النايب الزاير باعلان وتنسيق حسب الدرجات زيه زى النايب العادى ... المهم ان الفرق الجوهرى ف النايب الزائر انه بيقدم استقاله من وزارة الصحة عشان يتاخد ف الجامعة ومش بياخد مرتب من الجامعة .... في مقابل الميزة انه بيتعلم ف الجامعة كويس وبيخلص الماجيستير بتاعه بدرى ...فيه طريقة تانى لدخول الجامعةوهى عن طريق نقل التكليف او عمل انتداب إلى الجامعة بعد التسجيل لكن الموضوع دا بيخضع لعوامل كتير ومش دايما سكته مضمونة فخلينا ف الواضح لكل الناس اللى هوا نايب عادى او زاير

النايب الزاير فالعادى بيبقى عارف انه حيطلع بره الجامعة بعد ما بيخلص وف الاغلب بيبقى واخد تخصص هوا عارف انه حيعرف يشتغل فيه بعد كدا بعيد عن الصحة  او يقدر يعمل سمعه طيبة ف القسم ويخدوه بعد كدا اخصائى

النايب العادى او الطبيب المقيم هوا دا اللى بيتقسم إلى نوعين

ـــــــــــــــــــــــــــــــــــــــــــــــــــــــــــــــــــــــــ

ليك تعيين ولا مالكش تعيين ؟

ـــــــــــــــــــــــــــــــــــــــــــــــــــــــــــــــــــــــ

السؤال دا ممكن تسمعه من اول الامتياز وف الامتياز بيبقى مقصود بيه ليك نيابة ف الجامعة ولا لا وبعد كدا بيبقى مقصود بيه ليك تثبيت او تعيين كمعيد ولا لا ؟ الاجابة مش ثابته ومش بنسبة 100% عند كل الناس .... لان ساعات كتير ال 20 على الدفعة ما يتعينش وال 100 يتعين ....وفيه ناس بيبقى ليها نيابة وما تخدهاش وفيه ناس بتبقى  كاتبه قسم متاخر قوى ويصادف مفيش حد يكتبه قبلها ويدخله .... الخلاصة ان كل واحد بياخد نيابة عنده احتماليه للتثبيت والتعيين كمعيد وعنده احتماليه انه ما يتثبتش ويطلع بره الجامعة ( ما تعرفش بعد 3 سنين شكل القسم حيكون ايه وفيه احتياج للناس ولا لا ... مين حيبقى عايش ومين حيموت ..انته نفسك حتبقى عايش ولا ميت ...كله بعلم ربنا )

طيب ايه الفرق بين اللى ليه تثبيت واللى مالهوش ( على اعتبار ان الموضوع معروف مسبقا) ؟

مفيش فرق غير ان ساعات النايب اللى بيبقى عارف انه طالع الصحة بيبقى بيحاول يتعلم اكتر ويشوف اكتر عشان عارف انه مش حيلاقى كم الحالات ولا الشغل دا بره الجامعة وخصوصا ف التخصصات النادرة بره ....دا طبعا مش دايما بس ف اغلب الاحوال هوا دا اللى بيحصل

ـــــــــــــــــــــــــــــــــــــــــــــــــــــــــــــــــــ

طيب لو ليا نيابة ف الجامعة  والتثبيت مش مضمن اخدها ولا لا ؟

ـــــــــــــــــــــــــــــــــــــــــــــــــــــــــــــــــــ

 دا سؤال مهم جدا وفيه اكتر من اجابة عليه ...اللى حقوله هنا وجهه نظرى الشخصية من خلال اللى شفته حواليا .... فترة النيابة ف الجامعة بكل عيوبها من ضغط شغل وضغط من اعضاء هيئة التدريس وقله الموارد المادية مقارنه بالصحة  الا انها على المدى البعيد مفيدة جدا لانك بعد 3 سنين تقريبا بيبقى معاك ماجيستير وحتى لو ناوى تسافر بره فبدل ما حتسافر كطبيب مقيم حتبقى طبيب مقيم مؤهل ولو صبرت بعد الماجيستير سنين او ثلاث سنين حتسافر كأخصائى " سنوات الخبرة بعد الماجيستير " ...وحتى لو حتشتغل جوه مصر ولو حتروح الصحة ممكن ف الاول يغلسوا عليك وتروح تتوزع ف مستشفى مركزى ويعاملوك ف النبطشيات والشغل على انك نايب مش اخصائى لكن حتى مع دى كونك حاص على الماجيستير بيسهل عليك انك بعد تشتغل كاخصائى بعد شويه وتفتح عيادة بدون مضايقات كتيره ...

لكن هل كل النيابات جوه الجامعة زى بعض لو ماليش تثبيت او ليا ؟

ناس كتير بتفضل انها لو حتاخد نيابة ومالهاش تثبيت انها تختار نيابة ليها "سوق" بره بعد ما تخرج ...بمعنى انه يختار تخصص يقدر بعد ما يسيب الجامعة يشتغله بره بدون مشاكل ويقدر يفتح فيه عيادة ودا تفكير معظم الناس ...التفكير دا صح لحد بعيد وفى نفس الوقت فيه مشاكل كتير ...اولا زى ما قلت قبل كدا ما تبنيش اختيارك للتخصص اللى حتكمل فيه باقى حياتك على المتاح والممكن ..ابنيه على اللى انته عايزه وحاسس انك تقدر تدى فيه احسن ما عندك ... ثانى نقطة ان في المعتاد التفكير اللى فات بيبقى تفكير السواد الاعظم من الناس وعشان كدا بتلاقى الناس بتقبل على التسجيل او على نيابات بعينها على اساس ان دى اللى "سوقها " ماشى وبينسوا ا ناه سوقها ماشى لكن ف نفس الوقت عدد اللى بيشتغلوا فيها كتير وانك عشان تقدر تثبت نفسك يبقى برضه لازم تكون بتحب التخصص وتقدر تدى فيه كويس ... ثالث نقطة : زى ما قلت قبل كدا ما تعرفش بعد 3 سنين حيكون شكل الدنيا ايه وايه اللى حيكون مطلوب كتخصص وايه اللى حيكون حصل فيه تشبع وعدد الناس اللى فيه اكتر من المرضى نفسهم ....مثال : من خمس سنين مكنش فيه مكان ف الصعيد بيعمل عمليات قلب مفتوح غير جامعة اسيوط وبعدها جامعة سوهاج ...النهادة عندك جامعة اسيوط بقى فيها غير قسم جراحة القلب وحده لجراحة قلب الاطفال وسوهاج بقى فيها جامعة سوهاج ومعهد القلب تبع وزارة الصحة وقنا بقى فيها جامعة قنا والاقصر بقى فيها جراحة قلب ف الاقصر الدولى واسوان بقى فيها مركز مجدى يعقوب دا غير وحدة جراحة قلب ف المنيا ....دا غير معهد القلب اللى بيتشطب ف جامعة اسيوط ورا كلية الطب ...لو من 5 سنين لما كتبت جراحة قلب وصدر كان حد قالى ا ندا كله ممكن كنت عمرى ما حصدقه ...ويمكن لو ناس كانت امنت ا ندا ممكن يحصل كان بقى فيه اقبال على التخصص وقتها اكتر من كدا ...الامثلة اللى من النوع دا كتيره انا بس حبيتا جيب مثال انا متاكد منه من واقع التخصص ...كل الاماكن دى بتاخد ناس وبيشتغل فيها ناس واكيد مش حتقف على كداوحيبقى فيه توسعات ف المستقبل واكتر ناس استفادت من الاماكن الجديدة دى والتوسعات اللى بتحصل الناس اللى غامرت ف الاول واختارت التخصصات الدقيقة اللى ماكنش فيه مكان ليها ف وقتها الا جوه الجامعة وحتى جوه الجامعة كانت الصورة مظلمة بعض الشئ

اخر حاجة ف النقطة دى : كنت انت التغيير الذى تريد ...لو انته بتحب تخصص وحاسس انك تقدر تدى فيه خليك وراه ...حتى لو مش ف الجامعة بعد كدا ...اكيد حتقدر تعمل اللى انته عاوزه طالما نيتك خير بس الموضوع حيبقى عايز صبر وارادة ...مفيش حاجة بالساهل J

ــــــــــــــــــــــــــــــــــــــــــــــــــــــــــــــــــــــــــ

ماليش نيابة ف الجامعة او مش عايز الجامعة اروح فين

ــــــــــــــــــــــــــــــــــــــــــــــــــــــــــــــــــــــــــــــــــــــــــــــ

صحراوى ولا زراعى ؟

الزراعى ونس وامان شويه لكن بطئ ...الصحراوى سريع ومختصر بس فاضى متلقيش ناس كتير فيه ...

الزراعى انك تخلص امتيازك وتقدم ورقك ف الصحة وتتوزع على حسب مجموعك كطبيب تكليف في وحدة او مستشفى مركزى ...تستنى حركة النيابات العادية او الاستثنائية على حسب التخصصات وممكن تسجل بدرى لو اخترت تخصص من التخصصات الملحة وبعد ما تسجل تبتدى تعمل انتداب او تفرغ للمكان اللى عايز تتعلم فيه ....دا الطريق العادى لكل الناس اللى بطلع الصحة بيختلف من سنه إلى سنه على حسب الحاجة ف الوزارة يعنى سنه ينزلوا تكليف ف مستشفيات التامين الصحى او ينزلوا درجة طبيب تالت ف مستشفى تعليمى وهكذا حتى التخصصات الملحة بتتغير على حسب الحاجة

الصحراوى بقى ؟

الصحراوى انك تشوف الاماكن اللى فيها وظايف محدوده وبتاخد عدد قليل ومحدش بيسمع بيها كتير ...زى ايه ؟ برضه دى بتختلف من سنه للتانية لكن مثلا تعرف ايه عن بنك الدم السويسرى وتعرف ايه عن هيئة المصل واللقاح ...طيب تعرف ان هيئة المصل واللقاح دى ليها مستشفى ف رمسيس ف القاهرة وبتاخد تخصصات وبتسجل فيها على طول ... طيب مستشفيات صيدناوى والسكة الحديد ؟ مستشفيات الطلبة ؟ المستشفيات والمعاهد التابعة للجيش والشرطة ؟ كل دى اماكن بتاخد عدد قليل من الناس وبيبقى فيهاامتيازات اشهرها التسجيل بدرى واماكن كويسه للتعليم بس مشكلتها ف الاغلب ان التقديم بتاع كتير منها بيبقى قبل ما تخلص الامتياز ! طيب اعرف عنها ازاى بقى ؟ القاعدة ف الحاجات النادرة دى هى "ما يحك الا ضفرك " بمعنى ان محدش يسالك ويطوع يديك معلومات كامله عن الاماكن دى ...طيب والعمل ..لو عايز تدخل ف اماكن من دى يبقى لازم تزور الاماكن دى وتشوفها وتسال ناس جوها وتروح شئون لاطباء هناك وتسال الاعلان بتاعهم نازل امتى وايه الشروط وتحضر نفسك ... معظم الاماكن دى ف القاهرة وعشان كدا إللى ناوى على حاجة زى كدا بيبقى احسن كتير انه ياخد شهرين على الاقل ف القاهرة ..عشان تقدر تروح تشوف الاماكن دى وتسال عليها وكمان لما حتروح هناك حتلاقى ناس امتياز زيك من جامعات تانى وحتحتك بناس ليها فكر مخالف للى انته متعود عليه وممكن تكتشف اماكن جديدة مش مكتوبة حتى ف دليل التنسيق بتاع الوزارة ... وافتكر انم فيش حد حياخد من ايديك ويقولك تعالى اشتغل هنا انته اللى لازم تحفر طريقك وتدور بنفسك على المكان اللى يليق بك واللى تحب تشتغل فيه ....

ملحوظة: منتديات الامتياز وموقع وزراة الصحة وغيره من صفحات الفيس ممكن توفرك معلومات اوليه عن الاماكن النادرة دى لكن برضه بيفضل عليك انك تشوف بعينك وتعاين المكان اللى عايزتكمل فيه وتكلم ناس من اللى جواه عشان تعرف لاى مدى ممكن تشتغل فيه وهل هوا يناسبك انته تحديدا ولا لا

ــــــــــــــــــــــــــــــــــــــــــــــــــــــــ

يبقى لنا ف الموضوع دا التخصص من خلال الشهادات وايه الفرق بين المعادلات والزمالات وايه اللى ممكن تشتغل بيه جوه مصر واللى ممكن تشتغل بيه ف الخليج وايه اللى تسافر بيه بره خالص .... ان شاء الله الحلقة الجاية...دعواتكم

// وتحياتى J)))

 

 

الحلقة العاشرة

ــــــــــــــــــــــــــ

تعقيب على موضوع نيابة مش بحبها ونيابة بحبها من الحلقة السابقة

ــــــــــــــــــــــــــــــــــــــــــــــــــــــــــــــــــ

نقطة مهمة جدا فعلا ...بس زى ما قلت قبل كدا كل الحاجات دى "relative" انا شوفت قدام عينى زمايل اتخانقوا وزعلوا ودورا على اقسام فيها ناس "ليهم قرايب مهميييين" وهما راكبينهم ف الترتيب وبرضه ف الاخر ما اتعينيوش وشوفت ناس اتوفت وما كملتش المشوار معانا "ربنا يرحمهم ويحسن مثواهم" وشوفت ناس اتعينت لا كان على البال ولا على الخاطر .... وف نفس ذات الوقت حتلاقى ناس اتعينت ف اقسام وبقت استاف بس غير منتجين وطول الوقت محبطين ومصبطين للناس اللى حواليهم عارف ليه لان كل املهم ف الحياة كان انه يبقى استاذ جامعة ...طيب اهوه بقى ...خلاص مفيش تانى وهوا كاره التخصص ومش بيحب يشتغل فيه .....مع ملاحظة حاجة مهمة : ان فيه فرق بين انك بتحب تخصص وانك ميال ليه وانك مش بتحبه بس ممكن تشتغله وتدى فيه ...وانك مش طايقه ولا طايق "life style" بتاعه و لا طايق الناس اللى ف القسم دا وف الاخر عايز تاخده عشان هوا المتاح ...الكلام دا هوا اللى مش صح ...ودا اللى بيعمل مشاكل ف وقت كتابه النيابات ان الناس ما بتبقاش محدده هى عايزه ايه بالضبط او محدده بشكل صارم يعنى عايزه جراحة عامة بس فلو هوا مش محدد خالص بيقعد يدور ف وقت صغير مع الضغط من اللى حواليه حيخليه ياخد سكه من اتنين يا اما انه يختار بسرعة وخلاص ودا ف حد ذاته حيوديه ف قسم يا عرف يمشى فيه يا معرفش لانه مفكرش كويس "طول السنة" ولا عارف القسم دا فيه ايه الا لما دخله .... يا امه حيوديه قسم مش حيعرف يمشى فيه وف الحالة دى يا اما حيكمل مجبر وقرفان ومش منتج يا حيحاول يحول قسم تانى "اكاديمى السنه اللى بعدها او نايب زائر ف قسم اكتشف فجاة انه ميال ليه " ....الحل التانى واللى بنشوفه كتير انه بدل ما يختار بسرعة يشوف حد يختار على خياره يعنى تلاقيه قاعد يتلفت يمين وشمال ويدور على حد قبله وبعده ويشوف الناس عايزه تكتب ايه ويكتب زيها ...ودا برضه بيجيب مشاكل وبيزعل الناس من بعض وزيادة على كدا ايش ضمنك ان القسم اللى انته اختارته عشان فلان صاحبك قال عليه كويس انه يطلع فعلا مناسب ليك ؟ او عشان فيه 4 وراك عايزين يكتبوا القسم دا يبقى دا اللى عليه العين ...مبدا مريض .... الطريق التانى ف الموضوع انه يكون محدد تحديد صارم ... قسم بعينه ويفضل الفترة بتاعت كتابه النيابات يخبى ويحور ف الكلام او حتى يقولها بصراحة بس لو جتله يبقى تمام ..طب ما جالوش القسم دا ...بتلاقيه كان كاتب وراه اقسام مش متوقع اصلا ولا حاطط ف حساباته انه حيدخلها وهنا الصدمة ... ومن الصدمة طلع سهمين ...سهم انه يمتص الصدمة ويدخل القسم وامره لله .ومن المربع دا طلع سهم يرجعك لنقطة "قسم مش عارف يمشى فيه " السهم التانى انه يرفض هذا الموضوع وما يستلمش النيابة ويروح يدور على التخصص اللى هوا عايزه ف مكان تانى بره الجامعة ...مممممم ...دا اسوأ سهم فيهم لانه مش سهم لصاحبه بس لا دا سهم للناس اللى بعده اللى كان فيهم اكيد واحد كان نفسه يدخل القسم دا وصاحبنا دا فوت الفرصه عليه وكمان ايه مخدهاش لنفسه لاء سابها فاضيه ... الامثلة والنماذج على الحالات دى كتير للاسف وكلها في راى الشخصى بينبع من ان الشخص من الاول مش بيبقى عارف هوا عايز ايه او مش عامل حساب للظروف ...عشان كدا وبقولها للمرة المش عارف كام .... اقعد مع نفسك شوف انته عايز ايه وحط لنفسك هدف "القسم اللى انته عايز تبقى فيه" ورسالة " انك عايز تبقى دكتور شاطر ف التخصص اى ان كان التخصص دا ايه ...انك تبقى على قد المسئولية ...اى ان كانت المكان اللى حتطلع تشتغل فيه " وكمان حط خطط بديلة واقسام تانى تقدر تجيبها ف المرتبة التانية والتالتة من تفكيرك ...ما تستناش لما تتزنق وبعدين تقعد تفكر وتسال ...اهوه الوقت واسع قدامك ...فكر وخطط واستعن بالله ولا تعجز

المعادلة ....الزمالة ... اما نشوف !

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ايه الفرق اصلا ؟

ـــــــــــــــــــــــــــــ

المعادلة :من اسمها معادلة لشهادة البكالوريوس بتاعتك بشهادة بكالوريوس في "بلد" تانى .... بلد هنا محطوطة بين قوسين لان مفيش معادلة عالمية او سارية ف كل حته ...يعنى بالبلدى المعادلة هى امتحان بيخليك زيك زى خريج الطب ف البلد اللى انته امتحنت معادلتها ( وممكن يبقى معاها كام بلد تانى بالكتير)

الزمالة : الزمالة دى درجة علمية او نقدر نقول تخصصية ...بمعنى انها تقريب زى الماجيستير او الدكتوراه من حيث انك بتمتحن في تخصص واحد بس دى مفهاش رسالة بتتعمل والزمالة فيه منها اللى بيتعادل بعد كدا بدرجة الماجيستير او الدكتوراه المصرى بعد عمل رسالة ف مصر

....... طيب مما سبق امتى افكر ف معادلة وامتى افكر ف زمالة ؟

ــــــــــــــــــــــــــــــــــــــــــــــــــــــــــــــــــــــــــــــ

المعادلة شهادة لا بد منها للى حيروح يشتغل ف بلد المعادلة ...يعنى عايز تروح امريكا تشتغل "طبيب" وتكشف على مرضى وتعمل عمليات ...يبقى لازم تاخد المعادلة الامريكية ....

الزمالة ... مش شرط لما تاخدها يبقى تروح تشتغل هناك ...فيه ناس بتاخدها ومش بتقدر تسافر او بيبقى فيه ضوابط لسفرها للبلد صاحبه الزمالة

ـــــــــــــــــــــــــــــــــــــــــــــــ

اومال ايه فايدتهم ؟

ـــــــــــــــــــــــــــــــــــــــ

المعادلة "في اغلب الاحوال" مش بتديك اى فارق ف الوظيفة بتاعتك سواء ف مصر او بره مصر ف غير بلد المعادلة .... يعنى معاك معادلة امريكية بس وسافرت السعودية برضه حتاخد تقريبا نفس المرتب بتاع البكالوريوس المصرى بس ..

الزمالة ... مممم هنا لا ..هنا دى درجة علمية ... بمعنى انك ممكن تاخدها وتحضر رسالة (ف اغلب الزمالات مش كلها ) وتبقى كدا بدل الماجيستير ...او تستخدمها عشان تسافر بره سواء لبلد الزمالة ( ف العادى بيبقى فيه شروط تانى غير الزمالة عشان تسافر بلد الزمالة دى زى شرط لغة مثلا) او تسافر بيها الخليج عشان المرتب يبقى اعلى شويه .او ما تعمل شبيها حاجة غير انك تكتب على يافطة العيادة "زميل كلية الجراحيين الملكية بادنبره ولندن وانجلترا والمملكة المتحدة ) " ودا احتمال ضعيف وسخيف

ــــــــــــــــــــــــــــــــــــــــــــ

طيب المعادلات ...ايه انواعها ؟

ـــــــــــــــــــــــــــــــــــــــــــــ

المعادلات فيه منها المشهور وفيه منها اللى محدش بيدور عليه ولا يعرف اصلا انه موجود

المعادلات المشهورة : المعادلة الامريكية USMLE "على فكرة بتنطق يو اس ام ال ايه وليس يوزميل ...دا انجليزى مصرى بس )

ودى معادلة عشان تسافر تشتغل ف امريكا .... ف المختصر بتمتحنها على 3 اجزاء الجزء الاول step 1ودا المواد الاكاديمية ودا بتمتحه ف مصر وتكلفته تقريبا 800-900 دولار ..رسوم امتحان ...والجزء التانى step 2 csودا فيه جزء للمهارات الاكلينيكية بتمتحنه ف امريكا ...رسوم الامتحان هنا مش مشكلة تقريبا زى اللى فات المشكلة ف التذاكر والفيزا والجزء التانى step 2 ckالمعرفة الاكلينيكية ودا ممكن تمتحنه ف مصر واخير الجزء الثالث step 3 ودا امتحان لقياس مدى قدرتك على تحويل المعلومات الاكاديمية والاكلينيكية في تشخيص وعلاج المرضى ودى بيبقى امتحان ام سى كيو على الكمبيوتر على يومين يوم 336 سؤال في 8 ساعات ويوم 144 سؤال .... المهم ما علينا من تفاصيل الامتحان ...الملخص انك حتحتاج "وقت" ومجهود وبرضه فلوس عشان تقدر تخلص المعادلة دى ...طيب بعد ما اخلصها اعمل ايه ؟ بعد ما بتخلصها يا اما بتدخل ف برنامج matching ودا زى مكتب التنسيق عندنا بيتوزع فيه الناس بدرجاتها ورغباتها على التخصصات والولايات المختلفه وفيه طريقه تانية ان المكان هوا اللى يطلبك ودا ف حالة ما تكون اخدت تدريب فيه في الفترة اللى ف النص او ليك اتصال بهذا المكان وبرضه اكيد بيبقى درجاتك عاليه .... الطريقين اللى فاتوا دول بيكفلولك انك تاخد "نيابة" ف امريكا فترها على حسب التخصص والولاية والمستشفى اللى بتبقى فيها لكن الخلاصه انك بتعامل ك "طبيب" وبتاخد مرتب وتامين صحى وكل حاجة ...فيه طريقة تانية انك بعد ما بتخلص المعادلة بتاخد "fellowship" ودى زى الزمالة مش نيابة والفارق ا ندى بتختار انته التخصص دون الرجوع للمجموع بتاع المعادلة وكمان بتختار المكان المهم ان المكان يوافق عليك ... الشغل والفلوس والفرق بين النيابة والزمالة ف الموضوع دا فيه كلام كتير ... الملخص برضه :المعادلة مشروع كويس لو بتفكر "تعيش " ف امريكا وممكن تجهز له من وانته ف الكلية مش ف الامتياز بس ... وممكن يكون مشروع برضه كويس لو حتى ليك نيابة ف الجامعة وعايز تاخدها انك بعد النيابة تسافر بعثة امريكا فتشتغل هناك " اللى بيسافر بعثة ومش معاه المعادلة بيشتغل research fellow يعنى بحثى فقط ولا يشارك ف العملية العلاجية للمريض "... طيب مزيد من المعلومات ؟

- المعادلة الامريكية معترف بها ومطلوبة ف بلاد تانى غير امريكا؟ اه منها نيوزيلندا وكندا (تورينتو) وقطر ودار الفؤاد ف مصر ) مثال : http://www.dafheart.com/form/residency

- لازم اخد الاجزاء بتاعت المعادلة بالترتيب ؟ لا ممكن تختار اى ترتيب وتبتدى بيه المهم انك تخلصهم وفيه توقيت لكل مرحلة وعدد مرات للسقوط كمان

- من امتى ممكن اسافر امريكا؟ ممكن تاخد الجزء الثالث step 3 ف اول سنة ف النيابة وممكن تمتحنه بعد ما تستلم شغل لانكب تستلم تصريح مزاولة المهنة بعد step 1 +step 2 cs and ck

- طيب المزايا والعيوب كدا ف الاختصار ؟

o The motivations:

1- the best training/certificate in the world, even the native European and the canadian go for the USA to get the American board.

2- The structure of the residency/fellowship ensure that every candidate will be competent physician after finishing the training. The exams/training are not biased according to the professor choice. everyone in USA take the board at the same time and same questions.

3- The opportunity of research is optional in the community hospital and mandatory in the univ. hospital, but you dont have to prepare a paper to pass the board. if you are in a university, your paper will be published in the best journal because of the trusted database and the research experience of the us professors.

4- If you have a master, then the board exam in ur specialty can exempt you from the MD exam, but you will have to prepare the egyptain MD thesis.

o 5- The salary of the residents begin from 40-50,000 $ per year, then after the board, if you work as hospitalist, your salary will begin from 150,000. If you decide to continue fellowship, the salary is reduced again to 50-60,000 but after fellowship, the salary is amazing!

6- If you finish step 3 before the start of residency, you can apply for H1b visa which will give you green card after 6 years then citizenship after another few years

o The obstacles:

1- The money: 1,000 for step1, 1000 for step2ck, 2,500 for step cs (1,300 for exam,1200 for travel), 2500 for match applications + interviews), so minimum is 7,000$ to be able to secure a residency.

2- time: 6 month for step1, 4 months for step 2ck, 2 month for step 2 cs.

3- The visa issue: you should have some strong connections that attach you to egypt, or the embassy my reject the application to the cs exam.

4- the determination: you have to be hard worker, because you are competing with students from the whole world.

5- 40 % of the IMG finally match this year, so, you need to get high scores and to be a super applicant.

دى كلها معلومات اولية وعرضه للتغيير كل سنة وحسب القوانين بتاعتهم وهكذا يبقى احسن حل للموضوع دا حاجتين : اول حاجة ان دلوقتى بقى فيه مشروع ف الكلية للمعادلة الامريكية وفيه ناس بتيجى تتكلم على الموضوع وممكن تبتدى فيه حتى وانته طالب والحاجة التانية انك تدور على النت ...تدور ازاى ؟ جوجل والفيس وغيره وافتكر دايما نوع السيرش بتاعك ...يعنى اعمل سيرش عام ف جوجل وبعدين اختار النتايج اللى باللغة العربية بس " مثلا حتلاقى مواقع مصرية بتتكلم على المعادلة وتجيب الكتب بتاعتها منين ف مصر وممكن تلاقى "study partner " ,وغيره ومرة تانى اعمل سيرش واختار الحاجات اللى امتدادها ppt. او pdf. ممكن تلاقى عليها معلومات تانى ومرة سيرش على مجموعات الفيس وصفحاته ...وهكذا

ـــــــــــــــــــــــــــــــــــــــــــــــــــــــــــــــــــ

انا بعتذر على انى مش حقدر اكمل باقى المعادلات ف حلقة واحده لان بدور فيهم عشان اشوف المعلومات الجديدة قبل ما انزلها فبتاخد وقت كبير وف نفس الوقت الناس مستنية الحلقات فنصبرهم شويه )

بجد ف كل الحلقات اللى فاتت انا بستفيد من تعليقاتكم سواء على الحلقة نفسها او على الانبوكس او ف المستشفى لكن حلقات المعادلات والزمالات بالذات انا استعنت ببعض اهل الخبرة من الناس اللى اخدت الشهادات دى او بتذاكرها وهما اللى امدونى بالتفاصيل الجديدة والدقيقة ف الموضوع ورفضوا ان اساميهم تذكر ف الموضوع ...ربنا يجازيهم خير ويرزقنا كلنا الاخلاص في النية

الحلقة الجاية ان شاء الله ....المعادلة البريطانية PLAB وشويه معادلات مجهولة ...فرنسية وغيرها

========================================================

عودة الى اطباء الامتياز لانهم الامل والمستقبل ...بعد فترة توقف اتمنى ان تعذرونى عليا لكن الموضوع كان محتاج وقت عشان اتاكد من المعلومات منها للمعلومات القديمة والمغلوطة دا غير فترة الاكتئاب العام الذى تمر به البلاد

 

 

 

 

 

الامتياز : الحلقة الحادية عشر

ـــــــــــــــــــــــــــــــــــــــــــــــــــــــــــــــــــــــــ

استكمالا لموضوع المعادلات ... تكلمنا عن المعادلة الامريكية بشئ من التفصيل باعتبارها الاكثر انتشارا والكلام فى باقى المعادلات تعريفي واللى عايز تفاصيل اكتر عليه انه يدور عليها لان كل معادلة عايزة حلقات مش حلقة لوحدها عشان نشرح كل اللى فيها

ـــــــــــــــــــــــــــــــــــــــــــــــــــــ

المعادلة البريطانية  PLAB

ــــــــــــــــــــــــــــــــــــــــــــــــــــــ

امتحان بيؤهلك انك تعادل شهادة البكالوريوس بتاعتك بخريج فى انجلترا ...لغايه تقريبا 2006 كان ليها شعبية مقاربة للمعادلة الامريكية حتى تم تعديل قوانين الهجرة والاقامة بحيث ان التقدم للوظائف الطبية بقى لحاملى الجنسية البريطانية ودول الاتحاد الاوربى اولا ...ولو فضل مكان وفيه نقص فى الناس فى هذا المكان "ممكن" ياخد حد من دول اخرى ودا اللى خلى ناس كتير تبعد عن المعادلة البريطانية كوسيلة للعمل فى بريطانيا ومحدش بياخدها الا لو حيسافر بعثة او منحة وعايز يشتغل هناك وحتى دى برضه مش شرط لانها مش زى امريكيا بمعنى انك ممكن يكون معاك "زمالة" فى تخصص + امتحان اللغة ilets وتقدر تاخد بيهم ترخيص مزاولة مهنة من غير المعادلة

الامتحان من جزئين ولمزيد من المعلومات الموقع الرسمى ليها مليان كلام كويس وبسيط للى عايز الزيادة

http://www.gmc-uk.org/doctors/plab.asp

________________________

المعادلة الفرنسية DES

ـــــــــــــــــــــــــــــــــــــــــــــــــــــــــــــ

كنت نشرت كلام متفرق عنها قبل كدا مختصرها انها امتحان من جزئين "باللغة الفرنسية طبعا" بتمتحن الاول فى القاهرة  وبيبقى امتحان ام سى كيو واللى بينجح فيه بيقدم على الامتحان الثانى فى باريس بفرنسا وبيسافر على حسابه ولو نجح بيتم اختيار اعلى الحاصلين على الدرجات من كل اللى امتحنوا فى السنة دى وبيتعملهم نوع من التنسيق حسب الرغبات ويستلموا نيابات فى فرنسا ...4 سنين للتخصصات الباطنية و5 للتخصصات الجراحية

ميزة المعادلة دى انها مش مطروقة فى مصر يعنى عدد اللى بيقدم فيها قليل ...دا غير ان امتحانها اسهل نسبيا بالنسبة لباقى المعادلات " مشكلة اللغة دى على جنب " وغير كدا ارخص من باقى المعادلات برضه نسبيا ...اضف الى ذلك انك لما بتشتغل هناك بتعامل معاملة الطبيب الفرنسى ماديا وتامين صحى وكل حاجة

 

مشاكلها ... ان عدد اللى بيقدم من مصر قليل اه لكن باقى العالم كل دول الفرانكفورت " الناطقة بالفرنسية " بتقدم فيها دا غير دول المغرب العربى اللى لغتهم الاساسية تقريبا هى الفرنسية ودا بيشكل تنافسيه عاليه ...غير كدا انك لازم تجيب درجات عاليه عشان تضمن انك تاخد نيابة -  لان مش كل اللى بينجح بيتاخد -والا حيبقى المعادلة ما هى الا اعتراف بشهادة البكالوريوس بتاعتك بس

الموقع الرسمى ليها هنا دا غير مجموعة منتديات على النت حتلاقى فيها اسئلة امتحانات ونماذج اجابة وغيره وبرضه فى القصر العينى فى القاهرة فيه مكتبات حتلاقى فيها ورق ومذكرات مخصوصة للمعادلة دى لو مهتم ... اشهر المواقع ليها هو موقع جزائرى " مش بقولك" http://www.medix.free.fr/

 

 

_____________________

المعادلة الاسترالية

ـــــــــــــــــــــــــــــــــــــــــــــــ

قليل اللى بيفكر فىى المعادلة الاسترالية لوحدها ...تقريبا كل اللى بيفكر فى المعادلة الاسترالية بيبقى ناوى على هجره وعشان كدا بياخد سكه هذه المعادلة

المعادله بتاعتها سهله بالنسبه للمعادله الانجليزيه واقل تكلفه بالنسبه للكنديه او الامريكيه , ولان استراليا كما يسموها بلد المهجر وفي عجز شديد بالنسبه للاطباء

هناك عده خيارات للتسجيل وهي مثلا لو انت واخد المعادله الانجليزيه او الكنديه او الامريكه ممكن تعادلها بالاستراليه ,

طريق اخر وهو اللي كل الناس بتعمله وهو انك تسجل في المجلس الطبي الاسترالي وذلك لدخول الامتحان الخاص بهم والمتحان ده جزءين نظري (mcq ) وعملي

طريق التسجيل بيبدا بموقع المجلس الطبى الاسترالى www.amc.org.au وفيه حتلاقى معلومات حديثة عن المعادلة " خلى بالك فى كلام كتير على المنتديات والفيس لما تبص كويس للتاريخ بتاعه حتلاقيه من 3-4 سنين فاتوا وفيه قوانين وحاجات كتيرة بتتغير فدايما اه شوف المنتديات وغيرها بس عينك على الموقع الرسمى وتتابع كل تحديثاته " حتشوف المعلومات وحتلاقى كمان الكتب المقترحة ونظام الامتحان والمصاريف المطلوبة

من النقط اللى حتلاقيها جديدة ف المعادلة الاسترالية ان فيه غير طريق معادلة المعادللات الاخرى زى الامريكية والانجليزية والكندية وغير الامتحان العادى بتاع المعادلة الاسترالية فيه طريقة جديدة اضافت وهى امتحان + تقييم فى مكان العمل ودا معمول بيه فى 4 ولايات بس حتى الان ويعتبر طريقة جديدة " استطلاعية " لكن برضه اللى ناوى ممكن يحاول فيها اعتقد ممكن توفره وقت ومجهود كمان

المواقع والمنتديات فيها كلام كتير عن المعادلة الاسترالية احسنها من خلال بحثى كان المنتدى دا بس مشكلة الكلام انه قديم شويه لكن ممكن يتقرى للاستفادة مع تحديث المعلومات من الموقع الرسمى http://www.medadteam.org/forum/index.php?showtopic=8544

ــــــــــــــــــــــــــــــــــــــــــ

المعادلة الكندية

ـــــــــــــــــــــــــــــــــــــــــــــــ

ممممم برضه من المعادلات المنسية وكمان لان الجزء الاول منها مكنش فيه مكان ممكن تمتحنه فيه فى مصر لغايه وقت قريب كان ناس كتير مش بتحطه فى حسابتها " حاليا فيه مركزين فى مصر بعد ما كان اقرب مركزين لينا فى السعودية والامارات "

للتسهيل الناس بتقول ان المعادلة الكندية زى الامريكية 3 اجزاء لكن الحقيقة ان فيه فروق كتير بين الاتنين ...

مبدئيا الامتحان الاول فى المعادلة الكندية اسمه Medical Council of Canada Evaluation Exam  ودا المفروض انه امتحان من اسمه مبدئى بيكون ام سى كيو  ومش بيبقى فى العلوم الاساسية او الاكاديمية لا بيبقى كلينكال على خفيف

الجزء التانى اللى هوا MCCQE1 = Medical Council of Canada Qualifying Exam I زيه زى الامتحان الاول بس على اعمق او نقول اصعب بيبقى برضه ام سى كيو فى الكلينكال

الجزء الاخير وهو MCCQE1 = Medical Council of Canada Qualifying Exam II ودا بقى امتحان كلينكال او عشان الدقة نقول انه امتحان اوسكى من 3 ساعات بيبقى فيه كلينكال استيشنز

رسوم الامتحان فى حدود 1500 دولار كندى للاول و 900 للثانى و 2000 للاخير

فيه معلومات كتير برضه لللا عايز عن طريق الموقع الرسمى  http://www.mcc.ca/en/ او عن طريق المنتديات والمواقع اللى بتنقل خبرة الناس اللى دخلته وعدت فيه

برضه زى المعادلة الاسترالية معظم اللى بيفكر فيها هوا اللى مهاجر هناك او حد عنده بعثة كندا وحيقعد فترة هناك فعشان يقدر يشتغل بايده وياخد تصريح مزاولة المهنة

تكلفة المعادلة كتير شويه بالنسبة لباقى المعادلات وكمان فيه ولايات معينة بتشترط انك تقضى فيها مدة قبل ما تمتحن او تدخل فى الماتشنج من 6 شهور الى سنة

اخر نقطة كتاب المذاكرة للمعادلة الكندية اسمه تورينتو نوتس وممكن تلاقيه فى مكتبات القصر العينى وبى دى اف على النت

ـــــــــــــــــــــــــــــــــــــــــــــــــــــــــــــــــــ

دا كل اللى عرفت اوصله من " المعادلات " لكن طبعا اكيد فيه تانى والبركة فيكم تكملوا الموضوع دا  ...واخيرا نصائح عامة

فيه عدد ضخم جدا من المنتديات اللى بتعتبر زى  مراجع فى موضوع المعادلات اشهرها واكثرها زحاما من وجهه نظرى هى www.rxpgonline.com  ودا هندى بالمناسبة L

وفيه منتديات مصرية عربية كتير منها منتديات الطلبة والاطباء فى القصر العينى وعين شمس وفيه منتديات فيه موضوعات كتير عن المعادلات وشرح من الناس اللى عدت فيها زى دى مثلا : http://www.bala6y.org/vb/showthread.php?t=8477

اللى ناوى على معادلة او على سفر عموما للخارج مش بس محتاج يجهز معادلة لكن كمان لازم "يستف" ورقه تمام عشان حاجات كتير اذكر منها ... ICDL ودا مهم  فى اى سى فى بتاعت اى بنى ادم دلوقتى ... شهادة لغة  ودا على حسب البلد اللى انته رايحها لكن حتى لو هما مش طالبين دى حاجات بتساعدك فى المقابلات وفى تقديمك للورق

ممكن كمان رخصة قيادة دولية ... ودى بتجيبها من نادى السيارات فى وسط البلد بعد ما تقدم طلب + شهادة مخالفات من المرور ...مش حتكلفك كتير بس بتنفع

طبعا ماستر كارت او فيزا على مصاريف الامتحانات و  اللى ناوى كمان على هجرة بيبقى بقى مضبط نفسه  حساب فى البنك وكلام من دا

لو ناوى تكتب سى فى محترمه ما تنساش الهوايات والانشطة الاجتماعية والمجتمعية .... بلاش تكتب ف الهوايات القراءة والمشى عشان دى مفقوسه قوى والانشطة الاجتماعية نقطة مهمة حتى مش عشان السى فى دى عشان تبقى مواطن متفاعل مع مجتمعك مش بس بشغلك لا كمان بشخصك

لو دورت فى اى بلد حتلاقى فيه بلاد ليها معادلات او حتى امتحان بسيط وبلاد لا تشترط فاللى انا مجمعة دى مش النهاية دا بس عشان تعرف الدنيا ماشية ازاى والاهم انك تطلع عارف ازاى تدور على المعلومة وتجبها " لا تعطينى السماعة وتقولى دا بان سيستولك ميرمير ولكن علمنى كيف اسمع قلب العيان – مثل مصرى قديم خالص J)))

خالص تحياتى

 

 

 

الامتياز : الحلقة الثانية عشر

ــــــــــــــــــــــــــــــــــــــــــــــــــــــــــــــــــ

الزمالات

ـــــــــــــــــــــــــــــــــــــــــــــــــــــــــــــــــ

زى ما اتكلمنا قبل كدا ان الفرق بين الزمالة والمعادلة هو ان الزمالة بتبقى فى تخصص معين وبتبقى شهادة مساوية لدرجة الماجيستير او الدكتوراه لو تم عمل رسالة معاها

طبعا انوع الزمالات كتير زى انواع المعادلات ... وبرضه فيه منها المشهور اللى الكل بيحاول ياخده وفيه منها النادر

اشهر انواع الزمالات على الاطلاق هى الزمالات البريطانية وعشان كدا حنتكلم عنها بنوع من التفصيل اما باقى انواع الزمالات فلو حد مهتم حيبقى عرف بداية الطريق وعليه انه يكمل بحث عنها ..معظم باقى الزمالات مش منتشر فى مصر قوى لانه عادة بيبقى لازم اللى ياخد الزمالة يكون قضى فترة شغل فى البلد صاحبه الزمالة ودا ف العادى بيتطلب انه يكون اخد المعادلة بتاعت البلد دى وبالتالى بتبقى الزمالة استكمال لطريق المعادلة " كما هوا الحال فى الزمالات الامريكية والفرنسية " لكن الزمالة البريطانية مش كدا خالص ..... تعالوا تشوف .....

ــــــــــــــــــــــــــــــــــــــــــــــــــــــــــــــ

الزمالة البريطانية

ـــــــــــــــــــــــــــــــــــــــــــــــــــــــــــــــ

تعريف بالزمالة :
هى شهادة طبية يتم الحصول عليها من الكليات الملكية فى المملكة المتحدة بمعاونة المجلس الثقافى البريطانى British Council القائم بالقاهرة ليتم الارتقاء بالمستوى المهارى للأطباء .

نبذة عن المجلس الثقافى البريطانى :
** يقوم هذا المجلس بعرض خدمات كثيرة منها على سبيل المثال لا الحصر : يتم تقديم Librarian Information Services وهى هامة جدا لقطاع عريض من الأطباء الباحثين الذين يقومون بعمل بحث معين فى رسالة ماجستير أو دكتوراه ويحتاجون لمعلومات وأبحاث مشابهة لموضوع الرسالة وهى متاحة لأى طبيب يحتاج الى أى معلومات فى أبحاثه فما عليه فقط الا أن يزور الــ British Council ليحصل عليها ، الا أن هذه الخدمة موجودة فى أماكن أخرى بخلاف المجلس البريطانى .
** يضم المجلس عددا من الوحدات الهامة مثل :
1- وحدة المنح الدراسية للتدريس فى الخارج وهذه المنح تقدم مرة واحدة سنويا
2- وحدة الامتحانات الطبية والتى تدير الامتحانات المختلفة للزمالة
3- قطاع المكتبة والمعلومات وهى مكتبة حديثة منشأة على أحدث الطرز والتقنيات وبها أحدث الوسائل السمعية والبصرية ، ومن الممكن الاشتراك فى هذه المكتبة العلمية باشتراك سنوى قدره 60 جنيها أو اشتراك لمدة 5 سنوات وليس مطلوبا سوى صورة من اثبات الشخصية ويتم عمل الكارنيه فى خلال نصف ساعة ويمكن الاستعارة به فى نفس اليوم ، كما تتوافر بالمكتبة خدمات الانترنت مقابل حوالى 5 جنيهات للساعة .
4- وحدة تعليم اللغة الانجليزية بمستويات مختلفة حيث يتم عقد امتحان IELTS وهذا المصطلح اختصار لــ International English Language Teaching Service أو ما يسمى بالــ British toefl ويتكون من 4 skills or parts وهى التكلم ، والاستماع ، والقراءة ، والكتابة “Speaking , Listening , Reading , Writing” ويتم عقد هذا الامتحان فى المجلس مرتين كل شهر ، ويمكن للطالب أن يعتمد على نفسه ليؤهل نفسه بنفسه للامتحان أو يمكن أن يستفيد من الدورات اللغوية courses التى يتيحها المجلس مقابل 359 جنيها للــ course .

كيفية الالتحاق بالـ IELTS :
يتم الاعلان عنها فى جريدتى أخبار اليوم والأهرام مرة واحدة سنويا فى شهر أغسطس أو سبتمبر على الأكثر لكل طبيب فى مصر بدون تحيز أو عنصرية على الاطلاق ؛ فهى منافسة يحصل عليها الأفضل ، ويتم ملء استمارات معينة يجرى بعد ذلك فرزها وتحديد الأفراد ثم تعقد مقابلة interview ويعقد الــ IELTS لتحديد مستوى اللغة الانجليزية والذى يعتبر من المهارات الأساسية للطبيب كاستخدام المشرط والسماعة .

مدة الزمالة :
مدة الدراسة 5 سنوات وفى بعض الكليات 6 سنوات يعقبها تدريب عملى لمدة 12 شهرا وهى أشبه بفترة الامتياز .



أماكن التدريب :
التعليم الطبى والتدريبى لللأطباء فى انجلترا “ Medical Education & Training of Doctors in England “ .
يوجد فى المملكة المتحدة 25 كلية طب موزعة فى أنحاء المملكة يقدم فيها الجزء الأكاديمى لتخريج الأطباء ؛ فالجامعات مرتبطة بالنظام الدراسى الأكاديمى ، كما توجد بعض الهيئات professional bodies مسؤولة عن الناحية التدريبية علما بأن كل تخصص يوجد فى مكان مستقل مثل General Medicine , Surgery & Ophthalmology فقد كونت كل مجموعة من الأطباء المتخصصين رابطة أو جمعية تعمل فى تخصص معين وتتحكم بها وتضع قوانينها بنفسها وقد أطلق عليها اسم الكليات الملكية Royal Collages .

الكليات الملكية Royal Collages :

الهدف من الكليات الملكية :
هو الحصول على أفضل طبيب للسوق اليريطانى للمحافظة على أرواح الناس والاعتناء بها The best qualified skilled physicians وتوجد قوانين صارمة للتأكيد على ذلك , ويقبل الكثير من الأطباء المصريين على الاشتراك فى زمالة الكليات الملكية , ومن أشهر هذه الكليات :

1- الكلية الملكية للأطباء Royal Collages of Physicians والتى تعطى شهادة MRCP وهى تعنىعضوالكلية الملكية للأطباءMembership of Royal Collages of Physicians

2- الكلية الملكية للجراحينRoyal Collages of Surgeons والتى تعطى شهادة MRCS وهى تعنى عضو الكلية الملكية للجراحين وهى بديل عن الـ FRCS والتى كانت نعنى زميل الكلية الملكية للجراحين وذلك منذ عام 1996 .

3- الكلية الملكية لأطباء النساء والتوليد Royal Collages of Obstetrians & Gynaecologists والتى تعطى شهادة MRCOG وتعنى عضو الكلية الملكية لأطباء النساء والتوليد .

كما توجد جمعيات ذات تخصصات مختلفة ولكنها غير مشهورة فى مصر ولا يوجد عليها اقبال كبير مثل :

4- R.C. of Pathologist و هى مسئولة عن (Clinical Pathology , Haematology & Immunology )
5- R.C. of Radiologist
6- R.C. of Ophthalmologist


خطوات الحصول على الزمالة :
1- الجزء الأول من الزمالة :
** لابد للطالب أن يكون حاصلا على البكالوريوس ،وأن يكون قد أنهى فترة الامتياز ليستطيع تقديم الجزء الأول من الزمالة فهى لاتتعامل الا مع الـ Postgraduates بعكس ما هو موجود فى أمريكا حيث يسمح للطالب أن يأخذ الجزء الأول من الزمالة بعد السنة الثالثة من الدراسة فهى تتعامل مع الـ Undergraduates.
** تقديم الجزء الأول من الزمالة :
زمالة الباطنة : يتم تقديمها فى نقابة الأطباء
زمالة الجراحة: ويتم الاستعلام عن ذلك من المسئولين بالقوات المسلحة.
زمالة النساء والولادة: ويتم تقديمها فى مستشفى عين شمس التخصصى .
** وبالنسبة لزمالة الباطنة فمنذ 1988 أصبح هناك اختيار مابين الـ Option Pediatrics ζ General Medicine وانبثقت لذلك كلية ملكية هى R.C.of Option Pediatrics and Child Health وأصبح لها نشاط مع نقابة الأطباء فى مصر.
2- الجزء الثانى من الزمالة :
بعد أن يفرغ الطبيب من الجزء الأول لابد له من أن يحصل على خبرة تدريبية معينة ليستطيع أن يتقدم للجزء الثانى من الزمالة .
** بالنسبة لموضوع الخبرة, فهناك بديلان أمام الطالب :
1- أن يأخذ الطالب الجزء الأول فى المملكة المتحدة ثم يأخذ الخبرة فى مستشفى فى مصر ثم يعود لأخذ الجزء الثانى فى انجلترا.
2- أن يأخذ الطالب الخبرة فى مستشفى فى انجلترا أى يتم العمل فى نظام British Health System للتدريب فى المستشفيات تحت رعاية أطباء على مستوى عال من المهارة .
ولكى يتم العمل فى هذا النظام لابد من الحصول على تصريح المعادلة البريطانية PLAB Test وهو مشابه لتصريح مزاولة المهنة من نقابة الأطباء هنا فى مصر.

 

فيه كتير من المواقع حتلاقى عليها موضوعات كاملة عن الزمالة اشهر هذه المقالات واللى حتلاقيها تقريبا منقولة فى كل المواقع هى هذه المقالة

http://1aim.net/fourm/showthread.php?25401-كل-ما-يهمك-عن-الزماله-البريطانيه-بطريقه-بسيطه-وواضحه&s=db9a4100f1b7521762b8d3a2a34da189

المعلومات كويسة ومنظمة لكن للاسف المقال بقاله اكتر من سنة وعشان كدا فيه كتير من القنوانين اتغيرت

نبتدى احنا من الاول وحنستعين بالمقال لان كلامه كويس

هل فيه فرق بين ال Membership & fellowship

زمالة هى عضوية الجمعية الملكية البريطانية فى التخصص الفلانى

Membership دى اللى بتاخدها بعد ما تخلص امتحان الزمالة اما الfellowship دى بتاخدها بعد 6-8 سنين من اجتيازلك للامتحان وحاليا فيه تخصصات بيشترط انك تمتحن امتحان تانى بعد الفترة دى عشان تتنقل من membership الى fellowship

طيب ايه مميزات الزماله البريطانيه عن غيرها؟

الزماله البريطانيه تتميز عن غيرها بما يأتي
1- لا تستلزم السفر خارج مصر للحصول على الشهاده دا مش ف كل التخصصات لكن حاليا فيه كتير ممكن تمتحنه ف مصر
2- شهاده قويه جدا علميا وتعادل الدكتوراه المصريه بعد عمل رسالة
3- تكلفتها اقل بكثير من الامريكيه والاستراليه والكنديه
4- امتحاناتها اسهل بكثير من باقي المعادلات حيث تستلزم نجاح او سقوط فقط وليس score

5- ممكن تقدم بيها للعمل في دول كثيره من العالم زي استراليا واللي بتقبل الحاصلين على الزماله البريطانيه بالذات
ــــــــــــــــــــــــــــــــــــــــــــــــ

لو اخدت الزمالة اقدر اروح اشتغل فى بريطانيا ؟

لاء ....لوحدها كدا مش حتخليك تشتغل هناك لكن ممكن عن طريقها مع امتحان لغه ilets تقدم على تسجيل فى GMC اللى هيا زى نقابة الاطباء كدا وتاخد رقم ترخيص محدد لمدة

اومال ممكن اشتغل بيها فين ؟

ممكن تشتغل بيها ف الخليج

 

 

الامتياز والتعليم الطبى المستمر

 

احدى المشاكل الطبية العامة فى كل الدنيا هى مع ان الطب من العلوم اللى معظم المعلومات اللى فيها قائمة على دليل وتجارب وليس فرضيات او نظريات الا انه علم دائم التجدد ودا اللى بيخلى الناس بتجرى عشان تحاول تتواصل مع الجديد ف المجال اللى شغالين فيه

طيب لو بصينا لطبيب الامتياز اللى لسه مخلص الكلية طازة والمعلومات لسه قريبة منه حتى لو مش فاكر المعلومة على الاقل بيبقى فاكر مكان المعلومة فين او يلاقيها فى اى كتاب ... المشكلة ان ساعات كتير بيبقى مصدر المعلومات اثناء الدراسة قديم قوى وغير مجدد والناس اللى ف القسم محتفضين بيه على اساس " كفايه كدا على الطلبة بس هما يعرفوهم" ... ا وان الطالب كان بيذاكر من مجموعة مذكرات وورق مجهول المصدر لا يحتوى على اى مصدر للرجوع اليه لو حب يستزيد من المعلومة ... وهنا يبدا طبيب الامتياز يدور !! يجيب المعلومة الجديدة اللى عايز يعرفها ازاى ؟ الطرق العادية المتاحة هى

-          كتب القسم القديمة بتاعته وورقه ايام المذاكرة ...ودا عيبه انه مش متجدد وخصوصا لو حبيت تستعمله بقيت عمرك

-          شركات الادوية عن طريق المندوب اللى بيجيلك لحد باب العيادة واو المستشفى ويفضل يشرحلك ف مزايا المنتج بتاعه ..ودا معلوماته تخدم فقط شركته وكلامه ما ينفعش تاخده بانه مسلم بيه

-          عن طريق سؤال واحد من التخصص .... ينفع لما تكون عايز معلومة ثابته " يعنى مثلا النورمال فاليو بتاعت حاجة معينة " لكن ما ينفعش تساله مثلا عندك عيان عنده كذا وكذا يطلع ايه لانك بتنقله وصفك بناء على ما ترى لا على ما عند العيان بالضرورة

-          سؤال جوجل J ودى طريقة انتشرت الفترة اللى فاتت ..سهله وبسيطة وممكن تعملها من على الموبايل ... المشكلة انك برضه محتاج تراجع المصادر اللى بتاخد منها المعلومة ..مش كل موقع بيقدم معلومات طبية يبقى هوا دا الكلام

-          المؤتمرات ويمكن دى اقرب هذه الطرق للصواب لان ف المؤتمر بتلاقى كل واحد بيقدم الجديد اللى عنده حتى قبل ما ينشره وبيبقى فيه مناقشات ومجال لابداء الراى ... بس المهم ما تطلعش المؤتمر عشان تروح تقعد على البسين J

هذه الطرق وغيرها كثير هى مصادر حصولك على المعلومة وهى بحاجة الى تنقية وبحاجة الى ان تتعلم كيف تستطيع ان تستخلص من كل واحده فيهم افضل ما فيها

 

كتب القسم

ـــــــــــــــــــــــ

فيه منها انواع ...منها اللى مش من القسم اصلا بس بيعتمدوا عليه وفيه اللى عاملوا دكاترة القسم وفيه منه اللى معمول عشان فعلا يبقى كتاب وفيه اللى معمول عشان يبقى اسمنا عندنا كتاب ... ف الاغلب طريقة الطرح فى هذه الكتب " كتب القسم " تختلف عن مثيلاتها فى كتب المراجع الطبية وعن الممارسة بعد التخرج " راجع مثلا كتاب زى دافيدسون ف الباطنة حتلاقى فى اول كل شابتر فيه جزء عن الاعراض والعلامات فقط وبعدين يبتدى يشرح لكن دا مش موجود فى كتبنا المصرية – اللى حيقولى موجودين لوحدهم ف كتاب الكلينكال حقوله مهم ان كله يرتبط ببعضه والا ما فائدة العلم النظرى ان كان بعيد عن التطبيق او الكلينكال

 

شركات الادوية

ــــــــــــــــــــــــــــــ

كلام حلو كتير وعينات ادوية ويودوك مؤتمرات لكن هل فعلا الدواء بتاعهم كويس لا لاء ...لو سالته حيقولك دا احسن حاجة – شئ طبيعى – لو سالته على دليل حيجيبلك دراسات عن الدواء شوف الكلام دا معمول سنه كام ومعمول على كام مريض ومنشور فى انهى جرنال طبى محترم ...  فاكر من فترة واحد جابلى دوا جديد نازل مصر من ادوية خفض نسبة الدهون وقايل عليه نسب ممتازة وارقام الواحد اول مرة يسمع بيها وجايب معاها صورة من البحث المنشور فيه الكلام دا بالنظر فى البحث بدقه لقيته معمول على حاجة واربعين مريض فى الصين – اللى هما اصلا مش تخان ولا عندهم مشاكل كتيرة مع الدهون – ومنشور فى مجلة صينية برضه ملهاش مردود عالمى كبير واخيرا الموضوع بقاله اكتر من 7 سنين تقريبا يعنى لو كان دا طفره زى ما هوا بيقول كان زمانه انتشر على الاقل فى اوربا وامريكا مش لسه جايبينه مصر جديد ..... الخلاصة : دور ورا المعلومة لان اللى حتكتبه انته بجره قلم فى العيادة ما تعرفش المريض حيجيب فلوسه منين عشان يتعالج بيه

 

سؤال جوجل والنت

ـــــــــــــــــــــــــــــــــ

طريقة سهلة وبسيطة فعلا لكن لو دورت على اى موضوع على جوجل حتلاقى جوجل نفسه بيقسملك الموضوعات الى عده اختيارات منها مقالات اكاديمية او علمية ومنها صفحات نت .... هل تعلم بناء على ايه جوجل بيرتب المواقع اللى بتظهر عندك ؟ فى البحث العادى هوا بيعتمد على التطابق ما بين ما تطلبه وما هو متاح لديه وبعدين بيعتمد على عدد زوار الصفحة يعنى لو صفحة ناس دخلتها كتير حتلاقيها تطلع الاول وبناء عليه فى الابحاث الطبية حتلاقى القديم بيطلعلك الاول .... وعشان كدا لازم تستخدم بحث متقدم وتختار الترتيب على حسب التاريخ مثلا او على حسب الموضوع اللى بدور فيه

برضه حتى بعد ما تعمل كدا حتلاقى ان الصفحات اللى فيها معلومات مش شرط تكون معلومات طبية للطبيب لكن حتلاقى ويكيبديا وحتلاقى مواقع لمستشفيات كبيرة فيها جزء لتوعية المرضى بالمرض .... كلام ممكن يكون مفيد لكن عام ومفهوش لحد كبير الجزء التطبيقى اللى انته بدور عليه

طيب لو ما كنش جوجل يبقى مين ؟

ــــــــــــــــــــــــــــــــــــــــــــــــــــــ

جوجل ممكن يديك فكرة عامة عن الحاجة اللى بدور عليها وبرضه ممكن يوصلك عن طريق المقالات الاكاديمية لمعلومة كويسه بس برضه يفضل عمل زى السوبر ماركت الكبير لما تكون نازل تشترى عيش بس ... اكيد حتلاقيه فى السوبر ماركت الكبير بس حتلاقيه بايت وف كيس لكن لو تعبت نفسك شويه ومشيت لغايه المخبز حتاخد عيش طازة ويمكن كمان بسعر اقل ...

طيب ازاى نروح المخبز ؟

المخبز هنا حاجة اسمها محركات بحث طبية ...يعنى مخصوصه بانها تطلعلك المعلومات الطبية فى المقالات المنشورة فى المجلات الكبيرة .... او ساعات يبقى اسمها مواقع طبية للاطباء والعاملين بالقطاع الصحى مش معلومات للمرضى

طيب ..حروح مين فيهم وايه الفرق بينهم ؟

لازم الاول تعرف انته بدور على ايه وليه ؟ بمعنى هل انته بدور على معلومة عشان تعالج بيها مريض ولا بدور على معلومة عشان تعمل بحث او رسالة مطلوبة منك

بدور على معلومة عشان تعالج بيها مريض

ـــــــــــــــــــــــــــــــــــــــــــــــــــــــــــــــــــ

برضه على حسب انته عارف التشخيص وعايز معلومات عنه ولا مش عارف التشخيص وعايز حاجات مساعدة ... لو عارف التشخيص زى مثلا عيان عنده سكر وانته عايز تعرف ايه اخر حاجة الناس بتتكلم عليها دلوقتى فى السكر كدا حتلاقى فيه مواقع مخصوصه بتتكلم فى الموضوع دا – طيب اوصلها ازاى – فى العادى بيبقى فيه فى كل تخصص جمعية او جهة بتعمل جايدلاينز او خطوط ارشادية لعلاج مرض معين وفى الحالة ددى حدور على موقع الجمعية عشان اجيب منه التوجيهات دى ...طيب انا دكتور ممارس عام ومش عارف ايه موضوع الجمعية دى ... يبقى بكل بساطة حتكتب فى السيرش بتاعك دايابيتس جايدلاينز ....مش ديابيتس  بس وبكدا حتزود فرص انك توصل لكلام مضبوط وطبعا حتقارن النتايج اللى حتطلع  لان ممكن يطلعلك اكتر من 10 جايدلاينز حتختار مين فيهم ! حتشوف هل فيه حاجة انترناشونال الاول وبعدين حترتب الباقى عشان حسب عدد مرات مشاهدته – دا كمثال مش شرط يطلع مضبوط اوى – وبعدين مع الوقت بتلاقى نفسك لا اراديا بقيت محترف تقدر تحكم انهى واحد احسن من التانى

طيب دا لو انا عارف مرض وعايز معلومات موثقة او نقول جديدة عنه لكن لو انا مش عارف اشخص العيان ؟؟؟ هنا بقى حتستخدم النت بحذر شديد !! ليه ؟؟؟ لانك لو مش عارف توصل لتشخيص وقعدت تدور ممكن تعمل اسقاطات لاعراض المريض على 100 نوع مرض ودا ممكن يعرض المريض للخطر طالما انك بتعالجه بالطريقة دى ...طيب اومال تستخدم النت امتى فى التشخيص ؟ دا بقى لما تكون عندك مجموعة اعراض مؤكدة او نتايج تحاليل واشعات وانته عايز تشوف دا سيندروم على بعضه ولا دا مجرد كوانسيدنس وهنا بقى عم جوجل حيبقى مناسب جدا لانك حتدخل تقوله مثلا كذا + كذا + كذا ....حتلاقى جوجل بيكتبلك التالتة دول مع بعض يبقى السندروم الفلانى

برضه الكلام الاولانى بتاع الجيددلاينز كبير وتقيل ومش مريح  فى القراية ... فيه واقع بتعمل صفحات كنوع من تجميع للمواضيع ودا اشهرها لو عايز تقرا عن الموضوع تفاصيل حيكون موقع emedicine.com مثلا او لو عايز تقرا عن ازاى تشخص وتعالج حتلاقى موقع زى uptodate.com بس دا للاسف الجزء بتاع الدكاترة فيه بفلوس لكن دا الاشهر والاقوى حتى الان  لان الموضوعات اللى بتتكتب فيه بيشترطوا على اللى يكتب انه يستخدم الطب القائم على الدليل evidence based medicine ودا بيخليه من احسن الحاجات اللى ممكن تقراها لكن انته برضه ساعات بتقدر تتحايل على الموضوع دا – مش بانك تسرق باسورد – بانك لو حدور على موضوع تدور على evidence based medicine of …… وبكدا حتوصل تقريبا لمعلومات موثقة برضه عن الموضوع

طيب لو عايز ادور عل دوا

ــــــــــــــــــــــــــــــــــــــــــــــ

برضه فيه مواقع مخصوصة للادوية لكن عندك مواقع بتديك معلومات اساسية مثلا زى safefetus.com  دا بتديله اسم الدواء سواء تجارى او علمى وهوا بيديلك الدوا دا ينفع يتاخد فى الحمل ولا لاء بناء على توصيات منظمة الاغذية والدواء FDA approved وطبعا ممكن لو عايز حتلاقى موقع الFDA نفسه وحتلاقى مواقع كتير المهم انك قبل ما تقرا المعلومة تشوف الصفحة اللى فتحت دى صفحة لمعلومات مرضى ولا صفحة تبع الشركة المنتجة للدوا وهل اللى كاتب ان هذا الدوا كويس جايب referances ولا كلام مرسل وخلاص .... يعنى من الاخر تشوف الدليل قبل ما تشوف الكلام اللى جوا ايه

طيب عايز ادور على اللاصقة السحرية العجيبة : ))))

ـــــــــــــــــــــــــــــــــــــــــــــــــــــــــــــــــــــــــــــــــــ

اه ساعات بيجيلك مرضى بيسالوك فيه اعلان فى التلفيزيون على كدا ...دا ينفع ولا لاء .... طبعا معظم ان لم يكن كل هذه المنتجات اى كلام ومش واخده اى تصريح بس لان دا سؤال عام ومنتشر عند المرضى وبحكم طبيعة عملك لازم يكون ردك علمى مش تكهنى .....طبعا حتكتب الاسم العربى حتلاقى كل الصفحات دعاية ... حتضتر تشوف الاعلان وتلقط الاسم 0الانجليزى المكتوب على العلبة – ان وجد – على جوجل بقى المرة دى حتدور وبرضه فى الاغلب مش حتلاقى معلومات .... لكن فى الاغلب بتلاقى رد بعض المتخصصين على نقط معينة زى لو دا كدب طيب ازاى اللاصقة بتلون وكدا .... كلام ممكن تبصله على انه بسيط بس فعلا فيه مرضى غلابه جدا وبتمشى ورا الكلام دا وتدفع 99 جنيه + مصاريف الشحن عشان تشفى من جميع الامراض

بدور على معلومة عشان تعمل بحث او رسالة ؟

هنا طريقة البحث حتختلف ...لانك بدل ما بدور على مقال او معلومة للتشخيص حتلاقى نفسك مطالب انك تدور على معلومة موثقة او بمعنى اخر لها reference مرجعية ....يعنى المعلومة ما ينفعش تاخدها من uptodate ولا emedicine.com لان فى معظم كتاباتهم بيعتمدوا على ان الموضوع كله على بعض ليه كام reference  ف الاخر كدا لكن فى الرسالة انتا عايز سطر او معلومة وعايز تجيب مكانها جايه منين بالضبط ومين قالها واتنشرت سنة كام وفين ...دا بقى يبقى لازم تستخدم محركات البحث الطبية والاشهر منها مثلا pubmed و sciencedirect   طبعا فيه ناس حتسجل اعتراضها على ان المواقع دى مش كل المقالات اللى فيها مجانية ... برضه محلولة .... لو انته فى الجامعة او داخل الحرم الجامعى تحديدا فشبكة النت للجامعة معرفه على هذه المواقع ومواقع اخرى ويمكنك بسهولة الدخول عليها بدون رسوم ...طيب مش عارف ؟ ....فيه ادارة فى المبنى الادارى للجامعة اسمها ادارة المكتبة الالكترونية فى الدور الاول ودى حتلاقى فيها متخصصين واجهزة كمبيوتر وطابعات وكل حاجة ممكن تحتاجها وتقدر تروح هناك وتقول ان عندك حاجة معينة عايز ينزلها من مجلة وشوف بنفسك حتقدر تتساعد ولا لا......

طيب انا بره الحرم الجامعى فى قرية فى اخر الدنيا :

ـــــــــــــــــــــــــــــــــــــــــــــــــــــــــــــــــــــــــــــــ

برضه مش مشكلة ...موقع المجلس الاعلى للجامعات المصرية وموقع اكاديمية البحث العلمى بيوفروا بروكسى او طرق لدخول مواقع المجلات العالمية بدون رسوم لانهم مشتركين فيها وممكن تراسل الدعم الفنى فيهم وهوا يقولك تتحرك ازاى

غير كدا فيه مواقع وهيئات ممكن تبعتلها لينك للمقال اللى انته عايزه واللى بفلوس وهما بيجيبهولك ...زى موقع http://www.forums.asqh.org/ واللى بيقولك ابعتلى لينك المقال واحنا نبعتهولك فى خلال ايام كام

 

دا غير ان مندوب شركة الادوية اللى بيجيلك كتير وبيلح عليك عايز اى خدمة .... يا ريت ما تطلبش منه تصيف فى جمصة السنة دى واطلب منه انه يجيبلك معلومات – عن طريق المكتب العلمى للشركة – عن الدوا الفلانى او عن المرض العلانى ...دا سهل ومش بيكلفهم حاجة لان عادة المكتب العلمى بتاع شركات الادوية دى احدى وظائفه وهما بيعبروا دا نشاط علمى ممتاز .

طيب ... يبقى اذن فيه 100 طريقة لانك تحصل على مقال انته محتاجة – ما جيبتش سيرة ان تسال مشرفك على الرسالة ولا سيرة انك تستعين بمكتبة الكلية او القسم ولا سيرة انك تبعتلى شخصيا واحاول اساعدك ان شاء الله – وبكدا مالكش حجة تقول بيها انك مش عارف تجمع مادة عملية او انك محدوف فى مكان مفهوش خدمات .... زمان كان اللى بيحتاج مقال زى كدا كان ممكن يسافر وراه من اسيوط للقاهرة عشان يشوف مكتبة الجامعة الامريكية او مؤسسة مش عارف ايه .... احمد ربنا :)

فى حاجة على النت حتلاقى اسمها :CME ؟؟؟

دى بقى اختصار Continues medical education يعنى موضوع الحلقة دى وبره الموضوعات اللى محتاجه تعليم طبى مستمر بتتعمل فى صورة دروس تفاعليه او مرتبه كويس وبتتعرض عليك على النت وممكن فى اخر الكورس بتلاقى اسئلة عشان يطمن انك استوعبت المعلومة وفيه حاجات بيبقى فيها درجات او نقاط بحيث ان انته لازم تاخد مجموع معين من النقاط عشان تقدر تقدم على امتحان او غيره ... اللى يهمنا فى الكلام دا ان هذه الدورات متوفره ومفتوحة – من غير فلوس فى الاغلب – وحتوصلك لمعلومة حديثة ومضبوطة وسريعة - ...طيب ما قولت عليها ليه من الاول وريحت ...لانها مش فى كل المواضيع ومش دايما حتلاقى فيها الحاجات اللى نقصا ك او اللى انته فاتح مخصوص عشان تشوفها

 

المؤتمرات وورش العمل :

ـــــــــــــــــــــــــــــــــــــــــ

فى الاغلب بيجيلك عروض من شركات الادوية وغيرها لحضور مؤتمرات وورش عمل وكمان ساعات انته بتعرف بمؤتمر وبتبقى عايز تروح فبدور على شركة او مستشفى تساعدك فى المصاريف .....

المؤتمرات افضل الاماكن لاخذ معلومات حديثة .... المقولة الشهيرة بتقول

-           " اقرا textbook انته متاخر 5 سنين

-          اقرا journal انته متاخر سنتين

-          احضر مؤتمر ...u r just up to date

ليه الكلام دا .... لان اى كتاب حتمسكه حتلاقى انه لو انته جايبه جديد طبعة السنة دى – ودا نادر – حنقول معمول سنة 2012 .... يبقى اخد قد ايه وقت من اللى عمله عشان يجمعه ويكتبه ويتاكد وياخد موافقه ويطبعه ويوزعه وينشره وبتاع المكتبة يعملك منه نسخة ؟ ... عايز تتاكد افتح اى صفحة مراجع فى الكتاب دا حتلاقى معظم المراجع اللى الكتاب معول عليها من حوالى 3-4 سنين من تاريخ طبع الكتاب وطبعا دى عبارة عن مقالات منشورة فى مجلات اخدت وقت برضه عشان الباحث يعمل البحث ويجمعه ويشوف النتايج ويبعت للمجلة والمجلة تقبل وتنشره ...يعنى مش اقل من سنة كمان ...كدا يبقى الكتاب متاخر 5 سنين والمجلة متاخرة فى حدود سنتين لكن المؤتمر المفروض فيه ان الناس وهى بتطلع فى نتايج البحث بتاعها بتنشره از تقدمه فى مؤتمر وتشوف اراء الناس فيه ايه وعلى اساس كدا بتكتب باقى البحث وتبعته للمجلات عشان يتنشر ...لما بتحضر مؤتمر بتاخد احدث حاجة

 

طبعا حتقولى فيه مؤتمرات بتتعمل بس عشان الناس تروح مصيف او عشان الناس تسافر هنا وهناك ....فعلا ...لكن هنا يجى دورك انك تدور على مؤتمر يستاهل وحاجة انته عارف انها لجمعية او جهة اوقسم مشهود له باللقاءات العليمة القوية

 

طيب يعنى مفيش مؤتمرات ببلاش ؟

فيه طبعا وان كانت اقل شهرة ...زى اليوم العلمى لكل قسم بالكلية ..زى اليوم العلمى اللى بتنظمه نقابة الاطباء كل فترة .....زى محاضرات الدراسات العليا فى اقسام كتير بتبقى مفيدة ومنتظمة ...اه ممكن بعد المسافات يحول دون الحضور لكن حاول قدر الاماكن تبقى على اتصال بالجديد من خلال المؤتمرات واللقاءات العلمية عشان ما تبقاش زى دكاترة كبار كنت بتعيب عليهم زمان لانهم متحجرين عن حاجات قديمة وبس

 

طيب ورش العمل : فى العادى بتتبع المؤتمرات او بينظمها اقسام او النقابة او شركات ادوية حتى ...توصلها ازاى ؟ نفس الكلام خليك على صلة بالجمعيات فى مجال عملك ونقابة الاطباء فى محافظتك وشركات الادوية كدا كدا حيجولك ما تقلقش

 

واخيرا ولا اخرا

الناس بتبص لك على انك دكتور ... حاول قدر الاماكن يكون كل معلومة بتقولها او تكتبها او بتشيرها حتى على الفيس ليها دليل ومرجعية .... بلاش تنقل وخلاص من غير ما تتاكد من المعلومة .... ساعات كتير بتحس ا ندى لو ما نفعتش مش حتضر لكن تاكد انها  بالنسبة للمريض ممكن تعنى الكثير ليس فقط فى المال وانما ايضا فى الوقت – وتضيعه على علاج بلا جدوى – وفى الامال والتوقعات

انت اهل فتوى فى تخصصك ...يعنى لو مريض عايز يفطر فى رمضان ... الشيخ حيقوله لو الطبيب الثقة قالك ما تصومش يبقى ماشى ...يبقى كدا انتى بقيت مفتى فى مجالك ...عشان كدا اوى تخاف تقول معرفش ...احسن ما تقع فى مشكلة ...واقرا واسال مش عيب .... استغل فرصة انك لسه صغير وانك لا حرج عليك ان تسال ...افضل من الفتوى بدون علم

حاول تكون زى ما بتدور على مرجعية المعلومة واصلها ( زى علم الرجال فى علوم الحديث الشريف) برضه بعد ما تتاكد من المصدر حاول تشوف مدى اماكنية تطبيق هذا العلم على ارض الواقع فى مكانك .... مش شرط كل ما هو جديد يصلح للبيئة ولطبيعة المريض عندنا .... يعنى مثلا : قريت ان اللبوس افضل صورة دوائية للمادة كذا .... لكن انته عارف ان نوعيه المرضى اللى عندك لو كتبتله اللبوس ممكن ما يرضاش ياخده او المريض حيحتاج حد يديله الدوا ودا حيسببله نوع مش التاذى والخجل من العلاج مش حيخليه يكمل عليه .... دا معنى طبيعة المرضى ...لكن طبعا مفيش مانع انك تكلم المريض فى الاول وتفهمه ان اللبوس احسن حاجة لحالته ولو حسيت بالاقتناع فى كلامه يبقى اكتبهوله : )